7 հարց` Արամ Հարությունյանին

«Թռչկան» և «Խոսրովի արգելոց» քաղաքացիական նախաձեռնությունները բաց նամակով դինել են ՀՀ բնապահպանության նախարար Արամ Հարությունյանին:

Բաց նամակում մասնավորապես ասված է.

«Հարգելի պարոն նախարար.

Օգտվելով ՀՀ սահմանադրության 27.1-րդ և «Տեղեկատվության ազատության մասին» ՀՀ օրենքի 6-րդ և 9-րդ հոդվածներով ՀՀ քաղաքացիներին տրված իրավունքից, ինչպես նաև հիմք ընդունելով նույն օրենքի 8-րդ հոդվածի երկրորդ մասում նշված դեպքերում տեղեկատվության պարտադիր կերպով տրամադրման դրույթի պահանջը, խնդրում ենք մեզ տրամադրել հետևյալ տեղեկատվությունը` համապատասխան փաստաթղթերի պատճեններով.

1. Ո՞վ և ի՞նչ հիմքով կարող է Հայաստանի կենդանական աշխարհի օգտագործման, ինչպես նաև վերարտադրության կազմակերպման համար իրավունք ձեռք բերել: Տրամադրել մեզ այդ սուբյեկտների ցանկն՝ իրենց տվյալների հետ միասին:

2. Ի՞նչ և որքա՞ն պայմանագրեր են կնքվել ՀՀ բնապահպանության նախարարության կողմից Հայաստանի կենդանական աշխարհի օգտագործմամբ ու վերարտադրությամբ զբաղվող անձանց կամ ընկերությունների հետ: Մեզ տրամադրել այդ պայմանագրերի պատճենները:

3. Ի՞նչ պարբերականությամբ և եղանակով է վերահսկվում նշյալ սուբյեկտների գործառույթները: Տրամադրել վերահսկումների արդյունքում կազմված արձանագրությունների կամ ակտերի պատճենները:

4. Միևնույն ժամանակ մեզ տրամադրել կենդանական աշխարհի օգտագործման և վերարտադրության լիազորությամբ օժտված պետական և մասնավոր կազմակերպությունների ֆինանսական և թեմատիկ հաշվետվություններն՝ իրենց կատարած աշխատանքների և ՀՀ բնապահպանության նախարարության գնահատականների վերաբերյալ:

5. Որքանո՞վ է բարելավվել Հայաստանի Հանրապետության կենդանական աշխարհը այդ պայմանագրերի իրականացման արդյունքում:

6. Օգտվելով առիթից, խնդրում ենք նաև մեզ տրամադրել մանրամասն տեղեկատվություն ՀՀ կառավարության 06.04.2006թ. թիվ 479-Ա որոշմամբ <Կենդանիների աշխարհ> ՍՊԸ-ին կենդանական աշխարհի օգտագործման և վերարտադրության կազմակերպման նպատակով 49 տարով անհատույց փոխանցված տարածքներում սկսած 2006 թվականից մինչ օրս տեղի ունեցած գործունեության բոլոր տեսակների մասին, այդ թվում` կենդանիների օգտագործումն ըստ տեսակների և խմբաքանակների, կենդանիների վերարտադրությունն ըստ տեսակների ու խմբաքանակների, տարածքի օգտագործման ռեժիմի և այցելուների թվի և այլ մանրամասների մասին:

Միևնույն ժամանակ, մեզ տրամադրել հիշյալ կազմակերպության ֆինանսական և թեմատիկ հաշվետվությունների պատճենները:

7. 2006 թվականից մինչ օրս ի՞նչ գնահատականներ է տվելՀՀ բնապահպանության նախարարությունը «Կենդանիների աշխարհ» ՍՊԸ-ին շնորհված գործառույթների իրականացման հարցում և ինչպե՞ս են ազդել այդ գործառույթները «Խոսրովի արգելոց» ՊՈԱԿ-ի կանոնադրական գործառույթների իրականացման արդյունավետության վրա` հաշվի առնելով այն, որ մինչև 2006 թվականը «Կենդանիների աշխարհ» ՍՊԸ-ին անհատույց հանձնված տարածքը գտնվում էր Խոսրովի արգելոցի սահմաններում և ուներ հատուկ պահպանման ռեժիմ:

Վերոնշյալ հարցերի վերաբերյալ Ձեր տեղեկատվությունը կարող եք տրամադրել նյութական կրիչով, էլեկտրոնային տեսքով մեր էլեկտրոնային հասցեին կամ գրավոր փոստի միջոցով:

Ակնկալում ենք սեղմ ժամկետում ստանալ վերոնշյալ հարցերի վերաբերյալ մանրամասն տեղեկատվություն և փաստաթղթեր»: