Թուրքական դատախազությունը հետաքննություն է սկսել Մարութա Սուրբ Աստվածածին եկեղեցու ավերման հարցով
Սասունի շրջանում գտնվող Մարութա սարի գագաթին գտնվող հայկական Սուրբ Աստվածածին եկեղեցու ավերման հարցով թուրքական դատախազությունը հետաքննություն է սկսել:
Ինչպես տեղեկացնում է թուրքական Haberler կայքը, տեղական իշխանությունների ներկայացուցիչ Բահադիր Յորուքը հայտարարություն է արել, թե եկեղեցին ավերվել է անհայտ անձանց կողմից:
«Ժանդարմերիան ուսումնասիրություն է իրականացրել դեպքի վայրում: Մեր պահանջով` տարածքն ուսումնասիրել է նաև նահանգի Մշակույթի վարչության աշխատանքային խումբը: Այժմ սպասում ենք նրանց զեկույցին, որ առաջնորդվենք դրանով»,- ասել է Յորուքը:
Ավանդույթի համաձայն, այս տարի ևս, հուլիսի 30-ին Հայաստանից և Թուրքիայի տարբեր բնակավայրերից հավաքված հայերը արևածագը դիմավորել էին 2.983 մետր բարձրություն ունեցող Մարութա լեռան գագաթին, ապա մոմ էին վառել Սուրբ Աստվածածին եկեղեցում:
Եկեղեցին ավերվել էր դրանից հետո:
Լուրը լսելուց հետո Սասունի հայերի միությունը դիմել էր դատախազություն:
