Էկվադորի նախագահը չի հաստատել Ասանժին ապաստան տալու լուրերը
Էկվադորի նախագահ Ռաֆայել Կոռեան չի հաստատել տեղեկությունները, թե Wikileaks-ի հիմնադիր Ասանժին ապաստան տալու վերաբերյալ համաձայնություն է ձեռք բերվել:
Ավելի վաղ արևմտյան որոշ լրատվամիջոցներ նման տեղեկություն էին տարածել:
«Այդ տեղեկությունն իրականությանը չի համապատասխանում: Որևէ որոշում այդ հարցի վերաբերյալ դեռևս չի ընդունվել»,- Twitter-ի իր միկրոբլոգում գրել է Էկվադորի նախագահը:
Ավելի վաղ երկրի իշխանությունները հայտարարել էին, որ Ասանժին ապաստան տրամադրելու մասին որոշումը կկայացվի միայն Օլիմպիական խաղերի ավարտից հետո:
Մոտ 2 ամիս առաջ Ասանժը դիմել էր Մեծ Բրիտանիայում Էկվադորի դեսպանատուն` փորձելով խուսափել Շվեդիա արտահանձնումից, որտեղ նա մեղադրվում է սեռական բնույթի ոտնձգություններ կատարելու մեջ:
