Ախուրյան գետում թուրք երիտասարդ է խեղդվել
Թուրքական İhlas լրատվական գործակալության փոխանցմամբ՝ Հայաստանի ու Թուրքիայի սահմանով անցնող Ախուրյան գետում թուրք երիտասարդ է անհետացել: Նշվում է, որ թուրք երիտասարդն իր երկու ընկերների հետ որոշել են ձուկ բռնել Ախուրյան գետում և պիկնիկ կազմակերպել նրա ափին:
Նրանցից մեկը՝ Էրքան Ուրաքքայան, որոշել է մտնել գետը, ինչից հետո իր ընկերների աչքի առջև անմիջապես անհետացել է ջրի տակ: Երիտասարդի դիակի հայտնաբերման եռօրյա աշխատանքները որևէ արդյունք չեն տվել: Այդ նպատակով անգամ թե՛ թուրքական, թե՛ հայկական կողմերում փակվել է գետի վրա գտնվող ջրամբարը:
Ներկայումս թուրք երիտասարդի դիակի որոնմամբ զբաղված են 6 ջրասուզակներ, որոնք Էրզրումից են ժամանել այստեղ: Թուրքական կողմը չի բացառում, որ դիակը կարող է գտնվել գետի հայկական կողմում, սակայն այդտեղ որոնողական աշխատանքներ իրականացնելու համար անհրաժեշտ է Հայաստանի իշխանությունների թույլտվությունը:
