««Բարգավաճ Հայաստանը» որևէ «հակա» ճակատում լինել չի կարող»
Ասում է «Բարգավաճ Հայաստան» կուսակցության մամուլի քարտուղար, ԲՀԿ-ական պատգամավոր Տիգրան Ուրիխանյանը
– Պարոն Ուրիխանյան, ԱԺ ՀԱԿ խմբակցության ղեկավար Լևոն Զուրաբյանը 168.am-ին տված հարցազրույցում կարծիք էր հայտնել, որ իշխանական «ռեժիմը» սարսափում է «այն սցենարից, որ ՀԱԿ-ը և ԲՀԿ-ն սկսեն միասնաբար աշխատել այս ռեժիմի դեմ»: Համաձա՞յն եք այս գնահատականին:
-Ես կարծում եմ, որ «սարսափել» բառն այստեղ տեղին չէ, իսկ քաղաքական մրցակցության առումով` բոլորի համար շատ էական ու մտահոգիչ (բառի լավ` մրցակցային իմաստով) պիտի լինի ԲՀԿ-հասարակություն համագործակցությունը:
Իսկ թե ո՞ր ռեժիմի մասին է խոսքը, չգիտեմ, առավելևս՝ ես որևէ ռեժիմի խոսնակ չեմ: Իսկ պարոն Զուրաբյանի կարծիքի մասին, հարգանքով իր հանդեպ, պետք է ասեմ, որ մենք, այնուամենայնիվ, առաջնային ուշադրություն ենք դարձնում մեր համագործակցությանը հանրության հետ:
– «Ռեժիմ» ասելով` բնականաբար նկատի է առնվում նախագահ Սերժ Սարգսյանի իշխանությունը:
– Դե առավելևս, ես ի՞նչ իրենց տեղը պատասխանեմ:
– Իսկ ի՞նչ կասեք այն մասին, որ, ըստ ՀԱԿ համակարգողի` «տեղի է ունեցել սենսացիա. ԲՀԿ-ի 7 պատգամավոր միացել են Կոնգրեսի նախաձեռնությանը, իսկ կուսակցությունը պաշտոնապես հայտարարեց իր աջակցության մասին»:
– Ոչ, ԲՀԿ պատգամավորները ոչ թե միացել են ՀԱԿ-ին, այլ միացան հանրությանը հետաքրքրող հարցի շուրջ ավելի ակտիվ և արդյունավետ հսկողություն իրականացնելու նախաձեռնությանը, ինչպիսին այն թվում էր սկզբում:
– Իսկ ԲՀԿ-ն «հակահանրապետական» ճակատո՞ւմ է, ինչպես պնդում է Լ.Զուրաբյանը:
– «Բարգավաճ Հայաստանը» որևէ «հակա» ճակատում լինել չի կարող: ԲՀԿ-ն իր ունիկալ գործունեությամբ տարիների ընթացքում ցույց տվեց, որ առանց որևէ մեկին հակադրվելու, սեփական քաղաքական կուրս իրականացնելով` կարելի է պարզապես դառնալ այլընտրանքային քաղաքական ուժ: Եթե հիշում եք «այլընտրանք» ձևակերպումն առաջին անգամ ես հնչեցրեցի հենց այդ պատճառաբանությամբ և հիմնավորմամբ: ԲՀԿ-ն միշտ աշխատել է առանձին և որևէ կերպ «հակա» գործունեություն չի իրականացրել՝ ի տարբերություն որոշ այլ քաղաքական ուժերի, որոնք անընդմեջ սպասում են, թե որ կուսակցությունն ինչ կանի, որ դրան «հակա» մի բան անեն և հաստատվեն քաղաքական դաշտում:
