Սխտորը ոչ միշտ է օգտակար տղամարդկանց
Քննարկվում է խաշած լոբու խյուսով, տրորած պոպոքով և ճզմած սխտորով պատրաստված ուտեստի բաղադրությունը։
Ա. Լոբի. Տրոհում է երիկամների և միզապարկի քարերը, նպաստում է դրանց բորբոքային ընթացքի վերացմանը, ունի բարերար և կարգավորող ազդեցություն վահանաձև, ենթաստամոքսային, շագանակաձև գեղձերի գործունեության վրա։
Բ. Պոպոք. Միջուկը, միջնապատից, դեռ չհասունացած պտղից և ընկուզենու տերևից ստացված պատրաստուկներն օգտագործում են շագանակագեղձի և կրծքագեղձի հիվանդությունների բուժման համար։
- Ինչպես և լոբին, պոպոքի միջուկը նույնպես օգտակար է էնդոկրին համակարգին. այն կարգավորում է օրգանիզմի հորմոնալ գործընթացները։
Գ. Սխտոր. Սխտորի օգտակար հատկությունները բազմաթիվ են։ Այն ոչ միայն ճնշում է վնասակար բակտերիաները, այլ նաև, ի տարբերություն հակաբիոտիկ դեղերի, չի վերացնում աղիների օգտակար միկրոֆլորան, այլ հակառակը` բուժում է դիսբակտերիոզը։
- Սխտորն ունի նաև հակասնկային, նույնիսկ հակաբակտերիալ հատկություն։ Խորհուրդ է տրվում ընդգրկել քաղցկեղով հիվանդների սննդակարգում։
- Սխտորը և լոբին հարուստ են ծծումբով և արգինինով, պարունակում են գրեթե բոլոր` օրգանիզմում գոյացող և չգոյացող ամինաթթուները։
- Արգինինն ունի ինսուլինանման ազդեցություն։
- Սխտորը հեղուկացնում է արյունը։ Մեխանիկական և քիմիական ազդեցության դեպքում` ծամելիս և ստամոքսում, սխտորից անջատվում են նյութեր, որոնք ամրացնում են սրտամկանը և արագորեն իջեցնում են ճնշումը։
- Ստենոկարդիայի նոպայի դեպքում խորհուրդ է տրվում կուլ տալ սխտորի մեկ փոքր ատամիկ, իսկ արյան ճնշումը շատ արագ կիջնի, եթե ծամեք 1-2 ատամիկ սխտոր։ Ազդեցության մեխանիզմը բացատրված է «Մոգական բուժարարներ» թ.1 գրքույկում։
Կարևոր է իմանալ և կանխարգելել
- Մինչև 20-րդ դարի վերջը համարվում էր, որ սխտորը նպաստում է արական հորմոն տեստոստերոնի գոյացմանը։
- Վերջերս ճապոնացի գիտնականներն ապացուցել են, որ նման հատկություն ունի սխտորի փոշին, իսկ թարմը նվազեցնում է արական հորմոնի գոյացումը։
- Նշենք, որ սխտորի փոշին ստանում են սառեցման եղանակով (տե՛ս «168 Ժամ», 15.02.2014թ., «Մազերը միշտ չէ, որ գեղեցկացնում են» նյութի վերջում)։
Ինչո՞վ համեմել ավանդական սննդարար ուտեստը
- Մաղադանոս. Հյութի մեջ հայտնաբերվել է E վիտամինի մաս կազմող տոկոֆերոլ, որն ունի բարենպաստ ազդեցություն շագանակագեղձի վրա, նպաստում է արական հորմոնի գոյացմանը և, համապատասխանորեն, առնականության ուժեղացմանը։ (Տե՛ս Ջ. Սահակյանի` «Բնական աֆրոդիզիակներ» թ.4 գրքույկը)։
- Մաղադանոսի, կարմիր բազուկի և գազարի հյութերից պատրաստված կոկտեյլը (1։1։2) նպաստում է դաշտանի պարբերության կարգավորմանը։
- Զգուշացում։ Չի կարելի խմել ավելի քան 50-ական մլ` օրը 2 անգամ։ Կոկտեյլների մեջ մաղադանոսի չափաբաժինը կարելի է կրկնապատկել։ Խորհուրդ է տրվում խմել ուտելուց մեկ ժամ հետո։
- Մաղադանոսի հյութը հակացուցված է հղիներին, քանի որ կարող է խախտել պտղի բնականոն զարգացման ժամկետը։
Հ.Գ. Լույս են տեսել հեղինակի «Մոգական բուժարարներ» մատենաշարի թվով 4 գրքույկները: Հիշեցնենք, որ վաճառքում է նաև հեղինակի «Պահապան ծառերի բուժիչ զորությունը» գիրքը: Հեղինակի բոլոր գրքերը կարող եք ձեռք բերել «Նոյյան տապան», «Բուկինիստ», «Նոր գիրք» և «Արտ Բրիջ» (Աբովյան 20) գրախանութներից:
