«Գոհար Ենոքյանի դեմ սպանության նախապատրաստության կասկածանքով խայտառակ գործ է հարուցվել». փաստաբան. (լրացված)
168.am-ի տեղեկություններով՝ ժամեր առաջ ձերբակալվել է «Գարուն» ԲԲԸ խորհրդի նախագահ և գործադիր տնօրեն, ԲՀԿ խմբակցության նախկին պատգամավոր, Գոհար Ենոքյանը: Նա այժմ գտնվում է Էրեբունի համայնքի ոստիկանության ժամանակավոր պահման մեկուսարանում: Մենք քիչ առաջ զրուցեցինք Գ. Ենոքյանի շահերի պաշտպան Գեղամ Հակոբյանի հետ, ով ասաց.
«Հորինված, շինծու սցենարով` իբր սպանության նախապատրաստության կասկածանքով խայտառակ գործ է հարուցվել: Հիմա ավելին չեմ կարող ասել, քիչ հետո հանդես կգամ հայտարարությամբ»:
Նա նաև տեղեկացրեց, որ Գոհար Ենոքյանի հետ կատարվածի մանրամասները պարզելու համար մեկուսարան է այցելելու ԲՀԿ նախագահ Նաիրա Զոհրաբյանը: Հիշեցնենք, որ 73-ամյա Գոհար Ենոքյանը 1996-2007թթ. ՀՀ Արդյունաբերողների և գործատուների միության նախագահության անդամ էր, 2001թ. ԼՂՀ նախագահի կողմից պարգեւատրվել է «Մխիթար Գոշ» մեդալով: 2007թ. մայիսի 12-ին Ազգային ժողովի պատգամավոր է ընտրվել համամասնական ընտրակարգով «Բարգավաճ Հայաստան» կուսակցությունից: «Բարգավաճ Հայաստան» կուսակցության կանանց խորհրդի նախագահն էր: Այժմ ԲՀԿ շարքային անդամ է: Մանրամասները՝ առաջիկայում:
168.am-ի լրագրող Օֆելյա Հովհաննիսյանը քիչ առաջ տեղեկացրեց, որ ձերբակալվածների պահման վայրից դուրս եկավ ԱԺ ԲՀԿ խմբակցության նախագահ Նաիրա Զոհրաբյանը, ով հայտնեց որ ձերբակալվածների պահման վայրում հանդիպել է այսօր ձերբակալված Գոհար Ենոքյանին: Պատգամավորի խոսքով` Գոհար Ենոքյանը բավական բարձր ճնշում ուներ, գտնվում էր բժիշկների հսկողության տակ:
Ն. Զոհրաբյանը նաև ասաց, որ իր կարծիքով` ձերբակալության պատճառների մասին հարցերի կապակցությամբ պետք է պարզաբանումներ տա Հատուկ քննչական ծառայությունը, որի վարույթում քննվում է քրեական գործը: «Հիմա ավելին չեմ կարող ասել, զրուցել եմ տիկին Ենոքյանի հետ, բայց այս պահին ես իրավասու չեմ և լիազոր չեմ տիկին Ենոքյանի կողմից ավելին ասելու: Ինձ համար շատ կարևոր էր, որ իր առողջական վիճակը լինի կայուն, որովհետև ունի շատ բարձր ճնշում, բացի այդ նա ունի առողջական շատ լուրջ այլ խնդիր ևս և ես խնդրեցի սանաշխատողներին, որպեսզի առողջական խնդիրը պահեն ուշադրության կենտրոնում»:
ԲՀԿ խմբակցության նախագահ Ն. Զոհրաբյանն ասաց, որ չի կարծում, թե այս տարիքի կնոջ համար համար խափանման միջոց ձերբակալումը ճիշտ որոշում է.
«Եվ մենք անպայման կդիմենք, որպեսզի խափանման միջոցը փոխվի: Ես վստահ եմ, եթե նույնիսկ ինչ-որ մեղադրանքներ էլ կան, ապա այդ մասին, կարծում եմ, իրավապահ պատկան մարմինները պիտի տան պարզաբանում: Ես վստահ եմ, որ տիկին Ենոքյանի խափանման միջոցն անպայմանորեն պիտի փոխվի: Նա չի գտնվում այն առողջական վիճակում, որ կարողանա թեկուզ երեք օր մնալ այս նախնական կալանքի պահման վայրում»:
Ավելացնենք, որ Ն. Զոհրաբյանը բարձրացել է նաև այն խուցը, որտեղ պետք է մնար տիկին Ենոքյանը. «Այն նման էր բոլորի խցերին, սակայն նման խափանման միջոցն անընդունելի է համարում»:
Մանրամասներն՝ առաջիկայում:
