ԱՄՆ Գերագույն դատարանը չեղարկել է Մասնավոր հանրային վայրերում զենք կրելը սահմանափակող Հավայի նահանգի օրենքը
ԱՄՆ Գերագույն դատարանը հինգշաբթի հակասահմանադրական է ճանաչել Հավայի նահանգի օրենքը, որն արգելում էր զենք կրել հանրության համար բաց մասնավոր տարածքներում, եթե սեփականատերը ուղղակիորեն չէր թույլատրել դրա կրումը, հաղորդում է CNN հեռուստաալիքը։
Որոշման մեջ նշվում է, որ օրենքն ընդունվել էր Գերագույն դատարանի 2022 թվականի որոշումից հետո, որը զգալիորեն ընդլայնել էր զենք կրելու իրավունքները, և այն հակասում է ԱՄՆ Սահմանադրությանը։
«Այս ռեժիմը սահմանափակում է այն, ինչը պաշտպանում է Երկրորդ փոփոխությունը՝ ամենօրյա կյանքում ինքնապաշտպանության համար զենք կրելու ամերիկացիների իրավունքը։ Մենք վճռում ենք, որ օրենքը հակասահմանադրական է»,- հայտարարել է դատավոր Սեմյուել Ալիտոն։
Նոր որոշումը լուրջ հարված դարձավ զենքի նկատմամբ վերահսկողության խստացման կողմնակիցների համար, որոնք 2022 թվականի դատական վճռից հետո փորձում էին նոր իրավական ուղիներ գտնել՝ սահմանափակելու դրա առկայությունը խանութներում և այլ հանրային վայրերում։
