ԵԽԽՎ-ն քննադատական բանաձև է ընդունել Վրաստանում ժողովրդավարության վիճակի առնչությամբ
Եվրոպայի խորհրդի խորհրդարանական վեհաժողովը հունիսի 24-ին հաստատել է բանաձև, որում լուրջ մտահոգություն է հայտնել Վրաստանում ժողովրդավարության վիճակի վերաբերյալ՝ մատնանշելով քաղաքական բռնաճնշումների և ինստիտուցիոնալ ճգնաժամի նշաններ, հաղորդում է JAM News-ը։
«Ժողովրդավարական ինստիտուտների գործառնությունը Վրաստանում» վերնագրով փաստաթուղթը հիմնված է երկրի մոնիտորինգի գծով համազեկուցողների եզրակացությունների վրա։ Դրանում նշվում է քաղաքացիական հասարակության, ընդդիմադիր ուժերի և քննադատաբար տրամադրված լրատվամիջոցների նկատմամբ ճնշումների պահպանման մասին։
Վեհաժողովը Վրաստանի իշխանություններին կոչ է արել դադարեցնել ընդդիմության հալածանքները և հրաժարվել, իր գնահատմամբ, բռնաճնշումային օրենսդրության կիրառումից։ Առանձնահատուկ ընդգծվում է, որ ընդդիմադիր կուսակցություններն արգելելու փորձերը և դրանց առաջնորդների նկատմամբ քրեական հետապնդումները կարող են հանգեցնել հետագա քաղաքական բևեռացման և սպառնալիքի տակ դնել ժողովրդավարական գործընթացը։
ԵԽԽՎ-ի կարծիքով՝ երկրում տիրող ներկա իրավիճակը պայմաններ չի ապահովում լիովին ազատ և մրցակցային ընտրությունների անցկացման համար։ Այդ կապակցությամբ կազմակերպությունը իշխանություններին կոչ է արել բաց և ներառական երկխոսություն սկսել ընդդիմության ու քաղաքացիական հասարակության հետ։
Բանաձևում քննադատության են ենթարկվել նաև խոսքի և հավաքների ազատության սահմանափակումները, ինչպես նաև ճնշումները անկախ լրատվամիջոցների ու հասարակական կազմակերպությունների նկատմամբ։ Վեհաժողովը պահանջել է վերանայել մի շարք օրենքներ, որոնք նա համարում է քաղաքացիական և քաղաքական ազատությունները սահմանափակող, դրանց թվում՝
- օտարերկրյա ազդեցության թափանցիկության մասին օրենքը,
- օտարերկրյա գործակալների գրանցման մասին օրենքը,
վերջին շրջանի այլ նորմատիվ փոփոխությունները։
Բացի դրանից, ԵԽԽՎ-ն մտահոգություն է հայտնել ոստիկանության հնարավոր բռնությունների, ինչպես նաև ձերբակալվածների նկատմամբ դաժան վերաբերմունքի մասին հաղորդումների կապակցությամբ՝ կոչ անելով անկախ հետաքննություններ անցկացնել։
Բանաձևը միաժամանակ պաշտպանում է ԵԱՀԿ Մոսկվայի մեխանիզմի զեկույցի եզրակացությունները և Վրաստանի իշխանություններին կոչ անում կատարել դրա հանձնարարականները։
Լրացուցիչ դրույթներում Վեհաժողովն անդրադարձել է մի շարք առանձին հարցերի, ներառյալ՝ կալանքի տակ գտնվող ընդդիմադիր գործիչ Էլենե Խոշտարիայի առողջական վիճակին, նախկին նախագահ Միխեիլ Սաակաշվիլիի կալանքի տակ գտնվելուն, Ռուսաստանի դեմ պատժամիջոցների շրջանցման սխեմաներում Վրաստանի հնարավոր ներգրավվածության մասին լուրերին, ադրբեջանցի լրագրող Աֆգան Սադըգովի արտաքսման գործին, ինչպես նաև Սև ծովում Ռուսաստանի ռազմական ակտիվությանը և Աբխազիայի Օչամչիրա քաղաքում ռազմածովային բազա կառուցելու ծրագրերին։
