Երեկ հայտնի դարձավ, որ հուլիսի 19-ին անփառունակ կերպով տապալված Դատավորների ժողովից մոտ երկու շաբաթ անց՝ օգոստոսի 4-ին, Վճռաբեկ դատարանի նախագահ Լիլիթ Թադևոսյանը կրկին հրավիրել է Ընդհանուր ժողով:
Բարձրագույն դատական խորհրդի (ԲԴԽ) նախագահ Կարեն Անդրեասյանը ԲԴԽ իր շռնդալից, կայծակնային մուտքից հետո սկսել է դատավորների ճանաչողական գործընթացը՝ հասկանալու համար՝ ինչպես և որ ուղղությամբ մոտենա նրանց: Եվ եթե, օրինակ, նրա նախորդը Սերգեյ Չիչոյանից առաջ՝ Գագիկ Ջհանգիրյանը, բավարարվում էր դատավորներին տարատեսակ թե՛ անձնական, և թե՛ համակարգային փոփոխությունների խոստումներով, որոնցից կատարում էր միայն առաջինը, Կարեն Անդրեասյանը, բացի խոստումներից, որոնք արդեն իսկ տվել է դատավորների հետ պաշտոնական հանդիպումների ժամանակ, նաև մերձեցման երեկոներ է կազմակերպում:
