Օրերս Նիկոլ Փաշինյանը մեկնել էր Գեղարքունիքի մարզ, որտեղ բաց չթողեց ոչ մի մանկապարտեզ ու մանկապարտեզի խոհանոց, լոգարան, հատիկ առ հատիկ ստուգեց ամեն ինչ, հետո գնաց դպրոցներ, նրան ուղեկցում էր Գեղարքունիքի մարզպետը։ Վարդենիս այցի ժամանակ նրան ջերմորեն դիմավորեց Վարդենիսի համայնքապետ Ահարոն Խաչատրյանը։
Նախորդ շաբաթվա վերջին Նիկոլ Փաշինյանն այցելել էր Սյունիքի մարզ։ Մասնակցել էր Շուռնուխում բնակիչների տների վիճակահանությանը, այն բնակիչների, որոնց տները Շուռնուխ գյուղի մի մասի հետ հանձնել էր թշնամուն: Այցելել էր նաև սահմանամերձ Ներքին Հանդ գյուղ և պատասխանել բնակիչների հարցերին։
Մարտի 18-ին Նիկոլ Փաշինյանը գնացել էր Տավուշի մարզ, հանդիպել սահմանամերձ գյուղի բնակիչների հետ, հայտնել, որ տարածքներ պետք է հանձնվեն Ադրբեջանին, «այն տարածքները, որոնք հայկական չեն», հիմնավորելով, որ եթե այդ քայլին չդիմեն, վաղը կարող է Ադրբեջանը դիմի պատերազմի։
