Դանիել Վարուժանի մարդասիրական պոեզիան՝ Կարո Բերբերյանի «Դանիել» կինոնկարում
«Սև ֆիլմի» պատկերներ, մարգարեական տողեր. 20-րդ դարի արևմտահայ բանաստեղծ Դանիել Վարուժանի մարդասիրական պոեզիան ամփոփվել է Կարո Բերբերյանի «Դանիել» կինոնկարում: Ֆիլմը Երևանյան 15-րդ «Ոսկե ծիրան» միջազգային կինոփառատոնի «Հայկական համայնապատկեր» ծրագրում է:
«Շատ ուրախ ենք, որ ֆիլմն ընդգրկվել է «Ոսկե ծիրան»-ում: Այն արտհաուս ֆիլմ է: Ես սկզբում ուզում էի Ստամբուլում նկարահանել այն, բայց հնարավոր չեղավ, այդպիսով, ի վերջո, միտքս փոխեցի և եկա Հայաստան: Երբ եկա այստեղ, ֆիլմը Երևանում էի ցանկանում նկարահանել, բայց ցավոք հին շինությունները վերացել էին: Իմ պրոդյուսեր Նարե Տեր-Գաբրիելյանի հետ գնացինք Գյումրի և այնտեղ էլ նկարահանեցինք այն »,-նշեց ռեժիսոր Կարո Բերբերյանը:
Ֆիլմը երկլեզու է՝ հայերեն և անգլերեն: Անգլերեն հատվածներում Հոլիվուդի ամենահայտնի դերասաններից մեկը՝ Շոն Բինը ներկայացնում է Բեն Հոջսոնի բանաստեղծությունները, իսկ մյուս մասում Դանիել Վարուժանի պոեզիան է, որն արևմտահայերենով ներկայացնում է Եղիա Ազգունը:
Ռեժիսորի խոսքով՝ Վարուժանի դերը միանգամից երկուսն են մարմնավորում. ձայնը Եղիայինն է, իսկ հերոսին խաղում է դերասան Տիգրան Գաբոյանը:
Կարո Բերբերյանն առանձնահատուկ շեշտեց, որ մշտապես ցանկացել է Ցեղասպանության թեմային առնչվող ֆիլմ նկարել, քանի որ ընտանիքը տեսել է սոսկալի իրադարձությունները: Բայց գիտեր, որ այս թեմայով բազմաթիվ ֆիլմեր կան, և իր սև ու սպիտակ կինոյով փորձել է մարդկային պատմություն ցույց տալ:
Կարո Բերբերյանը լուսանկարչի կրթություն է ստացել, ապա արժանացել փողոցային լուսանկարչության «Ֆուձի» ուսանողական մրցանակին: Այնուհետև տեղափոխվել է հեռուստատեսություն՝ մոնտաժողից մինչև ռեժիսոր, ապա և գործադիր պրոդյուսեր դառնալով ու աշխատելով բազմաթիվ մրցանակակիր հեռուստատեսային, վավերագրական և լայն լսարանին ուղղված նախագծերում: Բերբերյանի առաջին կարճամետրաժ ֆիլմը՝ «Փոքրիկի վերադարձը» 2014-ին Լոս Անջելեսի «Արփա» ԿՓ-ում արժանացել է Հանդիսատեսի մրցանակին՝ որպես լավագույն կարճամետրաժ կինոնկար:
