Պուտինն ԱՄՆ նոր հակառուսական պատժամիջոցներն անվանել է «յուրահատուկ ցինիզմ»
Եթե ԱՄՆ-ն ընդունի հակառուսական նոր պատժամիջոցների օրինագիծը, դա կառաջացնի հատուկ ափսոսանք: Ինչպես հաղորդում է «Ռիա-նովոստի»-ն, այդ մասին Ֆինլանդիայի նախագահ Սաուլի Նիինիստյոյի հետ համատեղ ասուլիսում հայտարարել է ՌԴ նախագահ Վլադիմիր Պուտինը:
Պուտինը Վաշինգտոնի կողմից նոր սահմանափակումների մշակումն անվանել է «յուրահատուկ ցինիզմով գործողություններ»: ՌԴ նախագահի խոսքով, Ռուսաստանի պատասխանը կախված կլինի օրինագծի վերջնական տարբերակից: «Մենք, ինչպես գիտեք, մեզ դրսևորում ենք շատ զգույշ, համբերատար, բայց ինչ որ ժամանակ մենք ստիպված կլինենք պատասխանել: Անհնար է անվերջ հանդուրժել մեր երկրի նկատմամբ ինչ որ կոպտություն»,- ասել է ՌԴ նախագահը:
ԱՄՆ ներկայացուցիչների պալատը հուլիսի 25-ին ընդունել է Ռուսաստանի դեմ նոր օրինագիծ: Այժմ փաստաթուղթը պետք է դիտարկի սենատը և ստորագրի նախագահ Դոնալդ Թրամփը: Նոր փաթեթը կարող է դառնալ ամենամասշտաբայինը սկսած 2014 թվականից:
