ԱՄՆ-ի առաջին տիկինը և նախագահի կրտսեր որդին Վաշինգտոն կտեղափոխվեն ամռանը. Fox
ԱՄՆ-ի նախագահի տիկինը՝ Մելանյա Թրամփը, եւ կրտսեր որդին՝ Բերոնը, Նյու Յորքից Վաշինգտոն կտեղափոխվեն այս տարվա ամռանը: Այդ մասին հայտնել է Fox հեռուստաալիքը՝ վկայակոչելով Սպիտակ տան վարչակազմի՝ անունը չնշված բարձրաստիճան աշխատակցի:
Այդ աղբյուրի տեղեկությունների համաձայն, տեղափոխությունը կկայանա այն բանից հետո, երբ 11-ամյա Բերին, որը հաճախում է էլիտար մասնավոր դպրոց, ուսումնական տարին կավարտի իր համար սովորական միջավայրում: Սպիտակ տուն ժամանելը մի քանի ամսով հետաձգելու Մելանիայի մտադրությունը, որպեսզի Բերոնն ուսումնական տարին ավարտելու հնարավորություն ունենա, ավելի վաղ հաստատել էր նաեւ ԱՄՆ-ի վարչակազմի ղեկավար Դոնալդ Թրամփն ինքը, որի պաշտոնակալությունը տեղի է ունեցել հունվարի 20-ին:
Իր հերթին NBC հեռուստաալիքը ճշտել է, որ Մելանյան եւ Բերոնը, ինչպես սպասվում է, գլխավոր նախագահական նստավայր (գտնվում է Վաշինգտոնի Փենսիլվանիաավենյու 1600 հասցեում) կժամանեն «հունիսից հետո»: Վկայակոչելով անունները չնշված աղբյուրներ՝ NBC-ն նշել է, որ Մելանյան ներկայում ակտիվորեն մասնակցում է Սպիտակ տան բնակելի հարկաբաժինների համար կահույք ընտրելուն: Առայժմ Մելանյան եւ Բերոնը մնում են Հուդզոնի ափին գտնվող քաղաքում, որտեղ բնակվում են Trump Tower երկնաքերի փենթհաուսում:
Ի դեպ, Բերոնը կդառնա անցած ավելի քան կես դարի ընթացքում ԱՄՆ-ի նախագահի առաջին որդին, որն ապրելու է Սպիտակ տանը: Վերջին անգամ նախագահի մայրաքաղաքային նստավայրը միայն 1963 թվականին է տեսել պետության ղեկավարի որդուն: Այն ժամանակ նա ԱՄՆ-ի 35-րդ նախագահ Ջոն Քենեդու զավակն էր՝ Ջոն Քենեդի Կրտսերը, հաղորդել է ՏԱՍՍ-ը։
