Կիմ Չեն Նամի սպանության մեջ կասկածվողները դատարան են եկել զրահաբաճկոնակներով
ԿԺԴՀ-ի առաջնորդի եղբոր՝ Կիմ Չեն Նամի սպանության մեջ մեղադրվող երկու կանայք ապրիլի 13-ին Մալայզիայում դատավարության են ներկայացել զրահաբաճկոնակներով եւ հատուկ նշանակության ուժերի ուղեկցությամբ: Այդ մասին գրել է Straits Times հրատարակությունը:
Թերթը, վկայակոչելով փաստաբաններից մեկին, հայտնել է, որ մինչ օրս ոստիկանությունը պաշտպանող կողմին չի տրամադրել գործի նյութերը:
Նախօրյակին մեղադրյալներից մեկի փաստաբանը կասկած է հայտնել, որ իր պաշտպանյալը «քավության նոխազ կդառնա»:
Նշվել է, որ եթե կանայք մեղավոր ճանաչվեն, նրանց մահապատիժ է սպառնում: Հրատարակության տվյալներով՝ հաջորդ դատական նիստը կկայանա մայիսի 30-ին, հաղորդել է ՌԻԱ Նովոստին:
