«Ռուսները շուտով ոչ այնքան լավ բան կձեռնարկեն ղարաբաղյան հատվածում». Կարեն Վարդանյան
Ոստիկանության ՊՊԾ գնդի վրա «Սասնա ծռեր» խմբի անդամների հարձակման հետևանքով ստեղծված իրավիճակի հանգուցալուծման վերաբերյալ Սերժ Սարգսյանի ելույթի, Հայաստանի ուղեծրի և սպասվող զարգացումների շուրջ 168.am-ը զրուցել է Տեղեկատվական տեխնոլոգիաների ձեռնարկությունների միության գործադիր տնօրեն Կարեն Վարդանյանի հետ
– Պարոն Վարդանյան, նախ՝ Սերժ Սարգսյանն իր ելույթն ուղղեց «գործընկերներին», շեշտելով, որ «որպես պետություն՝ այս փորձությունից դուրս եկանք ավելի ուժեղացած», և ոչ թե՝ դիմեց հայ ժողովրդին: Ինչո՞ւ նա չդիմեց ժողովրդին:
– Ես կարծում եմ՝ ինքն ընդհանրապես չի հավատում, որ ժողովրդի մեջ որևէ պոտենցիալ կա: Այսինքն՝ իր ոճը դա է: Ինչո՞ւ մինչև հիմա մենք ռազմաարդյունաբերություն չունենք: Որովհետև ինքը հայ մարդու ստեղծագործ աշխատանքին և ստեղծարար հնարավորություններին չի հավատում: Եվ ոչ միայն ինքը: ՀՀ 3 նախագահներն էլ այդպես են եղել և միշտ նախընտրել են վերահսկողության միջոցով կառավարումը և դրա համար օգտագործել են իրենց կողքին այն մարդկանց, որոնք պատրաստ են 1000 տոկոս վերահսկողության տակ աշխատել: Խաղաղ ժամանակ դա գուցե, թեև, էլի արդարացված չէ, բայց երբ դու պետք է զարգանաս, այդ վերահսկողությունը ո՞նց է կազմակերպված, որ ամեն մեկը մյուսի մասին ինֆորմացիա է տալիս, և մարդիկ վախեցած, բոլոր տիպի նախաձեռնությունները սպանում են, որ հանկարծ մեկը մի բան չանի, որը կարող է ծանր հետևանքներ ունենալ:
Դրա համար երկիրն այս վիճակում է: Այսինքն, այն, ինչ ինքն արեց, դա ընդամենն իր ոճն է, այսինքն՝ աշխատել այն մարդկանց հետ, որոնք 100% ենթարկվում են իր վերահսկողությանը և պատրաստ են իրար վրա տեղեկություններ տալ, դրանով իսկ ապահովելով, որ երկիրը հանկարծ չզարգանա: Այսինքն՝ նա ոչ թե այդ նպատակն է դնում, այլ իր կառավարման հմտությունները նախատեսված են այդ տիպի համար, որը բացառում է զարգացումը: Միակ ձևը, որ ես տեսնում եմ, որ կարող է զարգացում ունենալ, դա այն վիճակն է, որ նա այլևս ոչ մի ռեսուրս չունի և հաշվի է նստում այն մարդկանց հետ, որոնք կարող են երկրում վստահություն ստեղծել և այդ վստահությունն օգտագործել զարգացման համար:
– Սերժ Սարգսյանը նաև նշեց, որ ազգային համաձայնության կառավարություն է շուտով ստեղծվելու: Ի՞նչ է սա նշանակում, և արդյոք այդ վստահելի մարդիկ կներգրավվե՞ն դրանում:
– Ես դրան չեմ հավատում, իր կատարմամբ ես դրան չեմ հավատում: Որովհետև իր կատարմամբ դա նշանակում է՝ իր գրպանի մի քանի կուսակցություններ հերթական անգամ նախարարական պորտֆելներ կստանան: Համենայն դեպս, հանրապետությունում կան մարդիկ, որոնք նրան կարող էին օգնել նման բան անել, բայց ես չգիտեմ որևէ փաստ, որ այդ մարդկանց հետ նա խոսել է: Դա նշանակում է, որ ինքը շարունակելու է հենվել այն մարդկանց վրա, որոնք իր նման՝ չեն հավատում, որ հայ մարդն ունակ է զարգացում ապահովելու: Եվ որքան ավելի դեպի վերև ադմինիստրատիվ սանդղակով, այդքան այդ մարդիկ ավելի պեսիմիստ են և որևէ հեռանկար չտեսնող:
– Քաղաքական և հասարակական որոշ գործիչներ հնչեցնում են կոչեր վերամիավորված Հայաստան ստեղծելու, Լեռնային Ղարաբաղը Հայաստանի հետ միավորելու մասին: Նման միտք կամ պահանջ կար նաև Ժիրայր Սէֆիլյանի հաղորդագրության մեջ: Ի՞նչ եք կարծում՝ արդյոք իշխանությունները կգնա՞ն նման քայլի:
– Իշխանությունների և արտաքին ուժերի ազդեցությունը Սէֆիլյանի հայտարարության մեջ առկա է, մի քանի կետ կա, որ ավելի պրակտիկ են, մնացածն ավելի պոպուլիստական կետեր են և այդքան էլ չեն վերաբերում իրական պրոցեսներ կազմակերպելուն: Ես կարծում եմ, որ մենք հիմա գործ ունենք գեոքաղաքական տեկտոնիկ փոփոխության հետ: Գուցե դա դեռ փոքր է: Չգիտեմ՝ որ ուժերը և ոնց, բայց ակնհայտ է, որ նրանք գտան նեղացած և ազնիվ տղաների, նրանց սադրեցին, և ընդհանուր սցենարը շատ նման էր Մայդանի սցենարին: Հիմա, փառք Աստծու, որոշ կորուստներով մենք այդ իրավիճակից դուրս եկանք, բայց ես կարծում եմ, որ պրոցեսն ավարտված չէ, որովհետև, ըստ էության, խոսքը գնում է Ռուսաստանի ուղեծրից Հայաստանի դուրս գալու մասին դեպի Միացյալ Նահանգների ուղեծիր: Մենք տեսանք, որ Ռուսաստանը որևէ ձայն առանձնապես չհանեց այս իրադարձությունների ժամանակ, չնայած ամբողջ Հայաստանի ուժային կառույցներում ռուսական ազդեցության մարդիկ են, բայց մենք չտեսանք, որ Ռուսաստանը որևէ ձայն հանի՝ հաշվի առնելով, որ ինքը կորցնում է այդ մարդկանց:
– ՌԴ ԱԳՆ պաշտոնական ներկայացուցիչ Մարիա Զախարովան էր հայտարարել, թե աջակցում են ՀՀ իշխանությունների քայլերին:
– Դա հերթապահ հայտարարությունն էր: Բայց ես խիստ կասկածում եմ, որ ռուսները մի ոչ էնքան լավ բան շուտով կձեռնարկեն, ենթադրում եմ, որ դա կլինի ղարաբաղյան հատվածում:
Հարցազրույցն ամբողջությամբ՝ տեսանյութում:
