Վենետիկի կինոփառատոնի ժյուրին կգլխավորի Սեմ Մենդեսը
Վենետիկի 73-րդ կինոփառատոնի տնօրինությունը հրապարակել է ժյուրիի նախագահի անունը: Նա բրիտանացի ռեժիսոր Սեմ Մենդեսն է, տեղեկացնում է Variety-ն:
«Մենդեսի աշխատանքները ինչպես կինոյում, այնպես էլ թատրոնում միշտ էլ բավարարում են թե ամենախիստ քննադատների սպասումներին, թե լայն լսարանի ճաշակներին: Դրանք դյուրությամբ հաղթահարում են աշխարհագրական ու մշակութային բոլոր արգելքները»,- փառատոնի ժյուրիի ղեկավարի ընտրությունը մեկնաբանել է կինոստուգատեսի տնօրեն Ալբերտո Բարբերան:
Սեմ Մենդեսը նկարահանել է բոնդապատումի երկու վերջին՝ «007. «Սքայֆոլ» կոորդինատները» եւ «007. սպեկտր» ֆիլմերը, որոնք համաշխարհային վարձույթում ընդհանուր առմամբ հավաքել են գրեթե 2 մլրդ դոլար: Նա արդեն հայտարարել է, որ այլեւս չի աշխատելու Ջեյմս Բոնդի մասին կինոնկարների վրա:
1999 թվականին Մենդեսը «Օսկար» եւ «Ոսկե գլոբուս» մրցանակների է արժանացել իր «Գեղեցկությունն ամերիկյան ձեւով» դեբյուտային ֆիլմի ռեժիսուրայի համար: Նրա նկարահանած ֆիլմերի թվում են նաեւ «Անիծված ուղին», «Ծովային հետեւակայինները», «Վերափոխումների ճանապարհը» եւ «Ճանապարհին» կինոնկարները:
Վենետիկի 73-րդ կինոփառատոնը տեղի կունենա օգոստոսի 31-ից մինչեւ սեպտեմբերի 10-ը:
