Վրաստանի որոշ ավտոճանապարհներին արգելվել է ավտոմոբիլային երթևեկությունը
Համաձայն Վրաստանի տարածքային զարգացման ու ենթակառուցվածքների նախարարության ավտոմոբիլային ճանապարհների դեպարտամենտի հաղորդագրության՝ Վրաստանի որոշ ավտոճանապարհներին, եղանակային պայմանների վատթարացման պատճառով, արգելվել է տրանսպորտի երթևեկությունը, հայտնում է «Գրուզիա օնլայնը»:
Փոթորկի, սահմանափակ տեսանելիության պատճառով արգելվել է բոլոր տեսակի տրանսպորտի երթևեկությունը Կոդա-Պարցխիսի-Մանգլիսի-Ծալկա-Նինոծմինդա ավտոմոբիլային հատվածներում՝ 94-110-րդ կիլոմետրերի միջև ընկած հատվածում (Նարդևանի-Ռոդիոնովկա (Պարավանի)):
Բացի այդ՝ արգելվել է բոլոր տեսակի ավտոտրանսպորտի տեղաշարժը Թբիլիսի-Սենակի-Լեսիլիձե ավտոմոբիլային ճանապարհին:
Խափանումներով է իրականացվում նաև Լարսի անցակետի մոտ ավտոմեքենաների տեղաշարժը, որտեղ ճանապարհի մի մասը ծածկված է ձյունով:
