«Տեղի ունեցածը որևէ կապ չունի տուժողների ազգային պատկանելության հետ»
«Սինջար» եզդիների ազգային միավորում հասարակական կազմակերպության ղեկավար Բորիս Մուրազին իր ֆեյսբուքյան էջում գրել է. «Հոկտեմբերի 15-ին սահմռկեցուցիչ դեպք է տեղի ունեցել Երևան քաղաքի Սիլիկյան թաղամասում՝ ավազակային հարձակման էին ենթարկվել ամուսիններ Շ. Ալիյանը և Թ. Սադայանը:
Ամուսինները ազգությամբ եզդի են և լուրը ու դեպքին վերաբերվող սարսափելի լուսանկարների տարածումից հետո ինձ հետ կապվել են եզդիներ աշխարհի տարբեր երկրներից և փորձում են հասկանալ արդյոք ազգային հողի վրա է տեղի ունեցել հարձակումը:
Դիմում եմ բոլոր այն եզդիներին ովքեր անհանգստացած են ամուսինների հետ կատարված դեպքով՝ հարգելիներս հանցագործը ազգություն չի ճանաչում: Տեղի ունեցածը ավազակային հարձակում է, որի ժամանակ ավազակները անմարդկային են վարվել ՀՀ ազգությամբ եզդի քաղաքացիների հետ:
Ինքս արդեն խոսել եմ ՀՀ ոստիկանության հասարակայնության հետ կապի և լրատվության վարչության պետ Աշոտ Ահորանյանի հետ: Դեպքի մասնարմասնները դեռևս պարզ չեն, սակայն արդեն իսկ հայտնի է, որ ավազակները տուժողների տանից տարել են գումար և ոսկյա իրեր: Խոսել եմ նաև տուժողների հարազատների հետ և իրենք էլ վստահ են, որ սա ազգություն չճանաչող հանցագործություն է և հույս են հայտնում, որ ՀՀ ոստիկանությունը շատ արագ կգտնի այդ ստահակներին: Ինքս էլ վստահ եմ, որ հանցագործները պատասխանատվություն կկրեն ՀՀ օրենսդրության ողջ խստությամբ:
Մենք ևս հետևողական կլինենք և անհրաժեշտության դեպքում միանշանակ կարձագանքենք: Եվս մեկ անգամ շեշտում ենք, որ տեղի ունեցածը որևէ կապ չունի տուժողների ազգային պատկանելության հետ»:
