«Ես ակնարկներ արեցի, դիվանագիտական հնարքների դիմեցի, դե, ես՝ ես եմ». Աշոտյանը՝ Պոլիտեխնիկի ռեկտորի ընտրություններից առաջ ունեցած իր ելույթի մասին
«Որպես լիազոր մարմնի ղեկավար մեր ուշադրության կենտրոնում էր գործընթացի օրինականությունը, և իմ գնահատականը ես կարող եմ և պարտավոր եմ տալ բացառապես գործընթացի կազմակերպման իրականացման իրավաչափության և օրինականության հետ կապված: Պետք է նշել, որ Պոլիտեխնիկի ռեկտորի ընտրության գործընթացը եղել է օրինաչափ, և այդ տեսանկյունից՝ ես շատ գոհ եմ գործընթացի որակից»,- քիչ առաջ լրագրողների հետ զրույցում այս մասին ասաց ՀՀ կրթության և գիտության նախարար Արմեն Աշոտյանը՝ խոսելով Պոլիտեխնիկում րոպեներ առաջ ավարտված ռեկտորի ընտրությունների մասին:
Հիշեցնենք, որ 19-ը կողմ ձայնով Պոլիտեխնիկի ռեկտոր դարձավ Ոստանիկ Մարուխյանը, իսկ Հովհաննես Թոքմաջայնը ստացել էր 12 ձայն:
Ա. Աշոտյանն ասաց, ոչ չի ուզում մեկնաբանել իր անձնական ընտրությունը, դա կարևոր չէ:
Հարցին՝ ընդունո՞ւմ եք, որ այս ձեր վերջին ելույթը մինչև ընտրությունն ինչ-որ չափով ուղղորդիչ դեր ունեցավ ընտրության արդյունքների վրա, նախարարն այսպես պատասխանեց.
«Ես որպես ՀՀ կրթության և գիտության նախարար հանդես եմ եկել խորհրդի նիստին՝ որպես խորհրդի անդամ: Պոլիտեխնիկի կանոնադրությամբ՝ խորհրդի բոլոր անդամներն իրավունք ունեն ելույթ ունենալու ընտրությունների ժամանակ և բացահայտ հայտնել իրենց տեսակետը: Եթե նկատեցիք, ես բացահայտ ուղիղ խոսքով տեսակետս հայտնեցի, ես ակնարկներ արեցի, դիվանագիտական հնարքների դիմեցի, դե, ես՝ ես եմ, ես շատ ավելի գեղեցիկ դա արեցի, ոչ թե ուղիղ խոսքով: Օգտվել եմ իմ հնարավորությունից այնպես, ինչպես ելույթ ունեցած խորհրդի շուրջ 10 անդամներ: Եթե կարծում եք, որ իմ տեսակետն այնքան հեղինակավոր է, որ կարող է կողմնորոշել չկողմնորոշված մարդկանց, շնորհակալ եմ»:
