Ուսխորհուրդները մտնում են լրատվական դաշտ
Եվս 100 տնտեսագիտական նյութ կհարստացնի հայատառ Վիքիպեդիան։ Նախաձեռնությունը Հայաստանի պետական տնտեսագիտական համալսարանինն է։ Այդ հոդվածները, ինչպես նաև Առաջին ուսանողական ալիքն ու ուսանողական խորհրդի նոր կայքը (asue-sc.am) դեկտեմբերի 3-ին ներկայացվեցին Հայաստանի պետական տնտեսագիտական համալսարանում։ Ներկաները դիտեցին Առաջին ուսանողական ալիքի առաջին թողարկումը։ Նշենք, որ Առաջին ուսանողական ալիքը գործում է Հայաստանի երիտասարդական հիմնադրամի աջակցությամբ։
ՀՀ կրթության և գիտության նախարար Արմեն Աշոտյանը ողջունեց տնտեսագիտական համալսարանի կողմից լրատվական կյանքի ուսանողական նոր էջի բացումը։ Նա հույս հայտնեց, որ լրատվական դաշտում տնտեսագիտականի ուսանողների պրոֆեսիոնալիզմը վարակիչ կդառնա մյուս բուհերի համար՝ կոչ անելով նախաձեռնության հեղինակներին լուսաբանել նաև առկա պրոբլեմները։ Արմեն Աշոտյանը ողջունեց նաև ուսանողների կողմից Վիքիպեդիան համալրելու արշավը՝ շնորհակալություն հայտնելով բոլոր այն մարդկանց, ովքեր հարստացրել են հայալեզու կրթական բովանդակությունը և կարողացել հետաքրքրություն ստեղծել այլոց համար։
Բուհի ուսանողական խորհրդի նախագահ Սերգեյ Խառատյանը տեղեկացրեց, որ իրենց ուսանողներն ակտիվորեն աշխատում են հայատառ Վիքիպեդիայի բովանդակությունը համալրելու ուղղությամբ։ Սեպտեմբերին նրանց ջանքերով զետեղել է 100 ռազմահայրենասիրական նյութ, այսօր հերթն արդեն մասնագիտական թեմաներինն է։ Նյութերի ընտրությունը կատարել են ուսանողները, դրանք հիմնականում Հայաստանի տնտեսությանը, ֆինանսներին, բանկային համակարգին վերաբերող հոդվածներ են։
Հայաստանի երիտասարդական հիմնադրամի հասարակայնության հետ կապերի ծառայություն
