ԱՄՆ-ը վաղը կփորձի համոզել ՌԴ-ին՝ կրճատելու սեփական միջուկային զինանոցը. The New York Times
Ամերիկյան The New York Times թերթի փոխանցմամբ՝ ամերիկյան պատվիրակությունը վաղը ժամանում է Ռուսաստան, որպեսզի փորձի համոզել Կրեմլին՝ հրաժարվելու համար միջուկային զինանոցի ընդլայնումից: Վաշինգտոնն ու Մոսկվան միջուկային զենքի պաշարների կրճատման մասին համաձայնագիրը ստորագրել են դեռևս 1987 թվականին:
ԽՍՀՄ փլուզումից հետո Ռուսաստանը՝ որպես նրա իրավահաջորդ, պարտավորվել է կատարել այդ փաստաթուղթը: Սակայն 2008 թվականից սկսած՝ Կրեմլը միջմայրցամաքային բալիստիկ հրթիռների փորձարկմամբ սկսել է խախտել միջուկային զենքի մասին համաձայնագիրը:
ԱՄՆ նախագահ Բարաք Օբամայի վարչակազմը միայն 2013 թվականի վերջին է ընդունել, որ Ռուսաստանը տապալում է միջուկային զինանոցի կրճատման մասին համաձայնագիրը: Ամերիկյան պատվիրակությունը վաղը կփորձի Մոսկվային համոզել վերադառնալ պարտավորությունների կատարմանը:
Ամերիկյան պատվիրակությունը գլխավորելու է ԱՄՆ պետդեպարտամենտի՝ սպառազինությունների վերահսկման գծով հանձնաժողովի նախագահ Ռոուզ Գոտեմյուլլերը: Ռուսական կողմի հետ բանակցություններին մասնակցելու են նաև ԱՄՆ Ազգային անվտանգության խորհրդի, Պենտագոնի ու Էներգետիկ դեպարտամենտի ներկայացուցիչները:
