ԼՂ-ի խնդրի կարգավորումը Թուրքիայի արտաքին քաղաքականության առաջնահերթություններից է. Էրդողան
Haqqin.az պորտալի փոխանցմամբ՝ Թուրքիայի նախագահ Ռեջեփ Էրդողանը երեկ երեկոյան պաշտոնական այցով ժամանել է Ադրբեջան: Բաքվի միջազգային օդանավակայանում նրան դիմավորել են Ադրբեջանի վարչապետի առաջին տեղակալ Յաղուբ Էյուբովն ու պաշտոնատար այլ անձինք:
Ադրբեջան մեկնելուց առաջ Էրդողանն օդանավակայանում լրագրողների հետ զրույցում հայտարարել է, որ Թուրքիան ու Ադրբեջանը ռազմավարական գործընկերներ են: Նրա խոսքերով՝ Թուրքիային ու Ադրբեջանին կապում են ոչ միայն տնտեսական կապերը, այլև՝ ընդհանրաապես եղբայրական հարաբերությունները:
Էրդողանն ընդգծել է, որ Ադրբեջանում քննարկելու է քաղաքական ու տնտեսական հարցեր, ինչպես նաև երկկողմ հարաբերությունների զարգացմանը հարցը: Էրդողանը հայտարարել է, որ Ղարաբաղյան հակամարտության կարգավորումը, Հարավային Կովկասի կայունությունը հանդիսանում են Թուրքիայի արտաքին քաղաքականության առաջնահերթություններից մեկը:
Նա հավելել է, որ Անկարան ուշադիր հետևում է Հարավային Կովկասի զարգացումներին և մշտապես հանդես է գալու այդ տարածաշրջանում կայնությանն աջակցելու օգտին:
