Մամուլի ազգային ակումբը մտահոգված է
Մամուլի ազգային ակումբը հանդես է եկել հայտարարությամբ, որով իր խոր մտահոգությունն է հայտնում Կենտրոն եւ Նորք-Մարաշ վարչական շրջանների ընդհանուր իրավասության առաջին ատյանի դատարանի որոշման կապակցությամբ:
Դատարանի որոշմամբ՝ «ilur.am» տեղեկատվական կայքին եւ «Հրապարակ» օրաթերթին պարտավորեցվում է բացահայտել տեղեկատվության աղբյուրը։
Հայտարարության մեջ մասնավորապեսո ասվում է, որ տեղեկատվական աղբյուրի բացահայտումը պետք է լինի խիստ բացառիկ դեպքերում եւ հանրային անժխտելի շահի առկայության դեպքում։
Մինչդեռ Գյումրիի ոստիկանապետի՝ ՀՀ քաղաքացու վրա զենք ճոճելու համար հարուցված քրեական գործը, ՄԱԱ համոզմամբ, նման բացառիկ դեպք չէ և չի կարող տեղեկատվական աղբյուրը բացահայտելու հանգամանք լինել, ուստի, հաշվի առնելով հայաստանյան իրականությունը, ՄԱԱ-ն վստահ է, որ տեղեկատվության աղբյուրի բացահայտումը կվտանգի տվյալ անձի (կամ՝ անձանց) ֆիզիկական անվտանգությունը։
Տեղեկատվության աղբյուրի պաշտպանությունը լրագրողի պրոֆեսիոնալիզմի և մասնագիտական արժեքների ու սկզբունքների պահպանման գրավական է, և հարկ է հարգանքով մոտենալ տեղեկատվության աղբյուրի գաղտնիության ապահովման՝ լրագրողների ձգտմանը՝ հասարակության շահերի ի պաշտպանության և պետական իշխանության ներկայացուցիչների վարքագծի բացահայտման նպատակով:
ՄԱԱ-ն պահանջում է Վերաքննիչ դատարանից վերանայել դատավոր Գագիկ Խանդանյանի կայացրած որոշումը, իսկ Արդարադատության խորհրդին՝ կարգապահական վարույթ սկսել դատավորի նկատմամբ՝ պարզելու համար, թե ինչով է պայմանավորված առանց «Հրապարակի» եւ «ilur.am»- ի ներկայացուցիչների մասնակցությամբ դատաքննության անցկացումը։
Մամուլի ազգային ակումբը կարծում է, որ տեղեկատվական աղբյուրը բացահայտելու այս նախադեպով գործող իշխանությունը փորձում է սահմանափակել տեղեկատվություն ստանալու և տարածելու մամուլի ազատությունը և տեղեկատվության աղբյուրի պաշտպանության՝ լրագրողների իրավունքը: Մամուլի ազգային ակումբը համոզված է, որ նման որոշումն էլ ավելի կմեծացնի հասարակության մեջ իրավական վհատությունը՝ մարդկանց ստիպելով շարունակել արդարություն, օրինականություն և պաշտպանություն փնտրել Հայաստանից դուրս:
