Մեկնարկել են դպրոցականների 2014 թվականի միջազգային առարկայական օլիմպիադաները. արդեն կա 6 մեդալ
Մեկնարկել են դպրոցականների 2014 թվականի միջազգային առարկայական օլիմպիադաները` մեր հավաքականների մասնակցությամբ, ֆեյսբուքյան էջում գրել է ՀՀ կրթության և գիտության նախարար Արմեն Աշոտյանը:
««Մաթեմատիկա» առարկայի 55-րդ միջազգային օլիմպիադան անցկացվել է հուլիսի 3-ից 13-ը Հարավաֆրիկյան Հանրապետությունում: Հայաստանի թիմը նվաճել է 2 արծաթե, 1 բրոնզե մեդալ և 3 գովասանագիր:
«Կենսաբանություն» առարկայի 25-րդ միջազգային օլիմպիադան անցկացվել է հուլիսի 6-ից 13-ը Ինդոնեզիայում: Մեր երեխաները նվաճել են 3 բրոնզե մեդալ:
Ընդհանուր առմամբ այս պահին մենք արդեն ունենք 6 մեդալ: Շնորհավորում եմ բոլորիս: Շնորհակալ եմ մեր աշակերտներին, մարզիչներին, իրենց ուսուցիչներին Հայաստանի պատիվը բարձր պահելու համար: Հաջողություն եմ մաղթում մեր մնացած օլիմպիական թիմերին: Առջևում դեռ քիմիայի, ֆիզիկայի, ինֆորմատիկայի և աստղագիտության միջազգային օլիմպիադաները»,-գրել է նախարարը:
