Ես կատարել եմ պարտականությունների իմ մասը, հերթը Թուրքիայի կառավարությանն է. Աբդուլլահ Օջալան
![](https://168.am/wp-content/uploads/2013/07/ocalan.jpg)
Թուրքական Zaman թերթի փոխանցմամբ՝ «Քրդստանի աշխատավորական» կուսակցության (PKK) հիմնադիր, Մարմարա ծովի Իմրալը կղզում ցմահ ազատազրկում կրող քուրդ առաջնորդ Աբդուլլահ Օջալանը Թուրքիայի իշխանություններին կոչ է արել կատարել «Քրդական հարցի» խաղաղ կարգավորման վերաբերյալ սեփական պարտականությունները:
Այս մասին հայտարարել է Օջալանի եղբայր Մեհմեթ Օջալանը, ով այցելել է Իմրալը և ծանոթացել եղբոր առողջական վիճակի մասին. «Եղբայրս ընդգծել է, որ արդեն իսկ իրագործել է պարտականությունների իր մասը և այսուհետ նույնպես անելու է իրենից կախված ամեն ինչ՝ գործընթացը ցանկալի ավարտին հասցնելու համար:
Սակայն նա նաև ընդգծել է, որ այդ գործընթացը չի կարող շարունակվել միայն մեկ կողմի ջանքերով: «Քրդական հարցի» խաղաղ կարգավորման մասնակիցները միայն քրդերը չեն, Թուրքիայի կառավարությունն էլ է: Եղբայրս զգուշացրել է, որ յուրաքանչյուր գործընթաց ունի որոշակի ժամանակ, ինչի սպառվելուց հետո այն կարող է դադարեցվել»:
Նշվում է, որ վերջին շրջանում բավական վատթարացել է 64-ամյա Աբդուլլահ Օջալանի առողջական վիճակը: Դրա հետ կապված՝ նրա եղբայր Մեհմեթը հայտարարել է, որ իրենք պահանջում են թույլ տալ անկախ բժիշկների մուտքը Իմրալը: Մեհմեթ Օջալանն ընդգծել է, որ մարդու առողջությունը չպետք է դառնա քաղաքական սակարկության առարկա:
Թուրք-քրդական հաշտեցման փուլը մեկնարկել է այս տարվա մայիսի 8-ին, երբ PKK-ի զինյալները սկսեցին լքել Թուրքիայի տարածքը: Երկրորդ փուլում Թուրքիայի կառավարությունը պետք է իրականացնի բարեփոխումներ՝ ապահովելու համար քրդական բնակչության իրավունքները, իսկ երրորդ փուլում պետք է ձեռք բերվի կայուն խաղաղություն և սոցիալական հաշտեցում: