Հասան Ռոուհանին կողմնորոշվել է ապագա կառավարության կազմի հարցում. ISNA
Իրանական ISNA լրատվական գործակալության
փոխանցմամբ՝ Իրանի նորընտիր նախագահ Հասան Ռոուհանին կողմնորոշվել է իր ապագա կաբինետում առաջատար պոստերի թեկնածուների հարցում:
Դա նաև վերաբերում է նավթարդյունաբերության ու արտաքին գործերի նախարարների, Ազգային անվտանգության բարձրագույն խորհրդի քարտուղարի պաշտոններին:
Գործակալությանը հայտնի է դարձել 17 ապագա նախարարների ցուցակը: Մասնավորապես, ենթադրվում է, որ նավթարդյունաբերության նախարարի պաշտոնը զբաղեցնելու է Բիջան Նամդար Զանգենեն, ով տվյալ պաշտոնը զբաղեցրել է 1997-2005 թվականներին:
Իրանի արտգործնախարար է դառնալու ՄԱԿ-ում Իրանի նախկին դեսպան Մոհամմադ Ջավադ Զարիֆը, իսկ Իրանի միջուկային ծրագրի շուրջ Արևեմուտքի հետ տարվող բանակցությունների համար պատասխանատու Ազգային անվտանգության բարձրագույն խորհրդի քարտուղար՝ Մոհամմադ Ֆորուզանդեն:
Պաշտոնապես այս ամենը դեռ չի հաստատվել: Յուրաքանչյուր նախարար նշանակվելուց առաջ պետք է հաստատվի խորհրդարանի կողմից: Գործակալությունը կարծում է, որ Ռոուհանին առանձնակի խնդիրների չի բախվի ապագա կառավարության կազմի հաստատման ժամանակ:
