Ֆրանսիայի ոստիկանությունն առգրավել է Էյֆելյան աշտարակի տեսքով 60 տոննա ֆիգուր
Բրիտանական Reuters լրատվական գործակալության փոխանցմամբ՝ Ֆրանսիայում ոստիկանությունը Լե Բուրժե օդանավակայանից ոչ հեռու ընկած պահեստում հայտնաբերել է Էյֆելյան աշտարակի տեսքով 60 տոննա ֆիգուր: Իրավապահների տվյալներով՝ հուշանվերները պետք է անլեգալ վաճառվեին զբոսաշրջիկներին:
Ոստիկանությունը նաև ձերբակալել է մի չինուհու, որին կասկածում են Ֆրանսիայում 8 սանտիմետրանոց աշտարակների հայտնվելուն մասնակցելու մեջ: Ոստիկանությունն ընդգծել է, որ Էյֆելյան աշտարակի այդ ֆիգուրներն արտադրվել են Չինաստանում և պետք է Էյֆելյան տարածքի մոտ վաճառվեին զբոսաշրջիկներին:
Այդ ֆիգուրներն ապօրինի ներկրվում են Ֆրանսիա և տարածվում կոմերցիոն գործունեություն իրականացնելու իրավունք չունեցող առևտրականների շրջանում: Առևտրականները սովորաբար ժամանում են Չինաստանից, Հնդկաստանից ու Սենեգալից:
Սովորաբար նրանց ազատ են արձակում ձերբակալելուց քիչ անց՝ տուգանելով 3750 եվրոյով՝ ապօրինի կոմերցիոն գործունեություն ծավալելու համար: Առևտրականներից շատերը մնում են Ֆրանսիայում, նրանց չեն արտաքսում հայրենիք: Փարիզը տարեկան ընդունում է մինչև 29 միլիոն զբոսաշրջիկ:
