Նելսոն Մանդելայի առողջական վիճակն օրեցօր բարելավվում է
Ռուսական ИТАР-ТАСС լրատվական գործակալության փոխանցմամբ՝ արդեն մեկուկես ամիս է, ինչ հոսպիտալացվել է ՀԱՀ-ի առաջին սևամորթ նախագահ Նելսոն Մանդելան: Վերջինիս թոռը հանգստյան օրերին այցելել է նրան և այսօր հայտարարել է, որ Մանդելայի առողջական վիճակը բարելավվում է օրեցօր.
«Ես շատ ջերմ զգացումներ ստացա այցից, քանի որ պապն օրեցօր դառնում է ավելի ու ավելի ուժեղ»: Դրանով իսկ Մանդելայի թոռը հերքել է շրջանառվող այն տեղեկությունները, թե Մանդելայի առողջական վիճակը վատթարացել է:
Ապարտեիդի դեմ պայքարի առաջամարտիկը և Խաղաղության Նոբելյան մրցանակակիրը հոսպիտալացվել է հունիսի 8-ին: Հուլիսի 18-ին Նելսոն Մանդելան դարձավ 95 տարեկան: ՄԱԿ-ի որոշմամբ՝ այդ օրը համայն աշխարհում նշվում է որպես Նելսոն Մանդելայի միջազգային օր:
