Այդ 18 մարդու կյանքի համար անմեղ «մեղավոր» է հայրս. Հրաչյա Հարությունյանի դուստր
Հուլիսի 13-ին Պոդոլսկում տեղի ունեցած խոշոր ավտովթարի մեջ մեղադրվող Երևանի բնակիչ Հրաչյա Հարությունյանի դուստրը՝ Լիլիթ Հարությունյանը, հորաքրոջ ու հորեղբորորդու հետ այցելել է Ազատության հրապարակ՝ ցուցարար ազատամարտիկներին: Լիլիթն«Առաջին լրատվական»-ին ասել է, որ մի քանի րոպե առաջ տեղեկացել են, որ Հրաչյա Հարությունյանին տեղափոխել են Բուտինսկու կալանավայր: Այս փաստը հարազատներին ավելի շատ է մտահոգում:
«Եթե իսկապես տարել են Բուտինսկու կալանավայր, ուրեմն ավելի հեռու է գնում ամեն ինչ: Նա այն վիճակում չէ, որ կալանավայր տեղափոխեին կամ հարցաքննեին, նա հոգեկան ծանր վիճակում է, գլխուղեղի ցնցում է ստացել, կրծքավանդակի սալջարդ, բուժման անհրաժեշտություն ունի: Անհրաժեշտ է բուժում, որից հետո կարելի է իմանալ դեպքի մանրամասները: Այս պահին նա ի վիճակի չէ խոսելու»,- տեղեկացրել է վարորդի եղբորորդին՝ Արմեն Հարությունյանը:
Նա տեղեկացրել է, որ երեկ փաստաբանի հետ կապ են հաստատել: Վերջինիս տեղեկացմամբ՝ հագուստ և Հրաչյային անհրաժեշտ այլ իրեր են տարել, բայց չեն ընդունել՝ առանց որևէ պատճառաբանության, ասել են՝ վաղը կբերեք: Հարազատները չգիտեն՝ այսօր ընդունե՞լ են հագուստը, թե՞ ոչ:
«Փաստաբանի տված հարցազրույցի համաձայն՝ նա չորրորդ անգամ է վարել մեքենան, նախնական վարկածի համաձայն՝ արգելակները անսարք են եղել, և նա չի կարողացել արգելակել: Ամեն ինչ արել է՝ զոհերից խուսափելու համար, սակայն չի հաջողվել: Չի տեսել, որ արգելակները չեն գործում, ու դուրս է նետվել, մինչև վերջ պայքարել է՝ ընդհուպ մինչև մեքենայի շրջվելը, որից հետո իներցիայով դուրս է շպրտվել մեքենայից: Իրեն չի շպրտել, շպրտվել է մեքենայից»,- ընդգծել է Արմեն Հարությունյանը:
«Իմ հայրը փորձառու վարորդ է, ու նմանատիպ բաներ երբեք չեն գրանցվել, ոչ մի անգամ վթարի չի ենթարկվել: Երբ որ փորձանքը գալիս է, չես կարող խուսափել դրանից»,- մտահոգություն է հայտնել Հրաչյա Հարությունյանի դուստրը: Նա կարծում է, որ հայրը փորձառության շնորհիվ փորձել է խուսափել զոհերից, ամեն ինչ արել է, բայց չի հաջողվել:
«Եթե փորձառու չլիներ, պատկերացնում եմ՝ քանի զոհ կլիներ: Ցավում եմ բոլորի համար, կորուստը շատ մեծ է ու անդառնալի, այդ 18 մարդու կյանքի համար անմեղ մեղավոր է հայրս, ցավակցում ու աջակցում եմ զոհերի հարազատներին, ես խոնարհվում են նրանց առջև: Ինձ համար ծանր է, ես շատ լավ գիտեմ՝ վիշտն ինչ է»,- ավելացրել է Լիլիթ Հարությունյանը:
Տեսանյութը՝ այստեղ.
