Սասուն Միքայելյան. Մի քանի հոգի իրենց գիտունի տեղ դրեցին, ժողովրդին փաստի առաջ կանգնեցրին
«Եթե նորմալ ընդդիմություն էին, թող նախագահական ընտրություններին մասնակցեին: «Գնա մեռի, արի սիրեմ» սկզբունքո՞վ են առաջնորդվում»,- Հայ ազգային կոնգրես կուսակցության այսօրվա որդեգրած քաղաքականությանն անդրադառնալով` 168.am-ի հետ զրույցում ասել է ՀԱԿ դաշինքի նախկին անդամ, ազատամարտիկ Սասուն Միքայելյանը:
«Ես ՀԱԿ անդամ չեմ եղել, բայց համաժողովրդական շարժմամբ մենք երկրում փոփոխություններ ենք իրականացրել: Իսկ այսօրվա որդեգրած ռազմավարությունը շատ սխալ է` դրա համար էլ էս օրին հասանք, երկրի վիճակը վատացավ, մարդիկ էլ չեն հավատում, որ ընդդիմություն կա»,- ավելացրել է նա, ապա խոսելով ՀԱԿ-ի սխալների մասին` նշել. «ՀԱԿ-ի կազմում չկա՞ր որևէ մեկը, որ առաջ քաշեին` մասնակցեին, ոչինչ, թե հետո չէին պարտվի: Հիմա կայուն ընդդիմություն կլիներ հանրապետությունում: Բայց սրա փոխարեն գնացին ՀՀՇ-ն ցրեցին` ՀԱԿ ստեղծեցին, իբր… չեմ էլ հասկանում` ի՞նչ արեցին, ոչ էլ հասկանում եմ` իրենք հասկացա՞ն` ինչ արեցին: Ինչ անում են, իրենց ձեռքով են անում: Այսքան տանջանք, տառապանք, բայց մի քանի հոգի իրենց գիտունի տեղ դրեցին, ժողովրդին փաստի առաջ կանգնեցրին: Նման դեպքերում է ժողովրդի հավատը մեռնում, հավատացե՛ք»:
Սասուն Միքայելյանի հետ ամբողջական հարցազրույցը կարդացեք «168 Ժամի» այսօրվա տպագիր համարում:
