Հորմուզի նեղուցում անկայունության պատճառը ԱՄՆ-ի և Իսրայելի գործողություններն են. Արաղչի
Իրանի արտգործնախարար Աբաս Արաղչին հայտարարել է, որ Հորմուզի նեղուցում ստեղծված լարված իրավիճակը և ծովային բեռնափոխադրումների խափանումները ԱՄՆ-ի և Իսրայելի գործողությունների հետևանքն են։ Այս մասին նա ասել է Ավստրիայի արտգործնախարար Բեատե Մայնլ-Ռայզինգերի հետ հանդիպման ժամանակ, որը տեղի է ունեցել Նյու Յորքում՝ ՄԱԿ-ի Գլխավոր ասամբլեայի շրջանակում։
Արաղչիի խոսքով՝ տարածաշրջանում նավագնացության անվտանգությունը վերականգնելու համար անհրաժեշտ է դադարեցնել այն գործողությունները, որոնք, ըստ նրա, ապակայունացնում են իրավիճակը, ինչպես նաև վերացնել Իրանի նկատմամբ ԱՄՆ-ի տնտեսական սահմանափակումները։
Հանդիպման ընթացքում կողմերը քննարկել են նաև տարածաշրջանային և միջազգային զարգացումները։ Մայնլ-Ռայզինգերը, իր հերթին, ընդգծել է դիվանագիտությանը վերադառնալու և լարվածությունը թուլացնելու անհրաժեշտությունը՝ նշելով, որ Հորմուզի նեղուցի բացումը կարևոր է նաև համաշխարհային տնտեսության համար։
