Ռուսաստանը կմասնակցի G20-ի էներգետիկայի հարցերով հանդիպմանը. Սպիտակ տուն
Ռուսաստանը կմասնակցի «Մեծ քսանյակ»-ի (G20) երկրների էներգետիկայի նախարարների հանդիպմանը, որը նախատեսված է անցկացնել ԱՄՆ-ի Հյուսթոն քաղաքում՝ սեպտեմբերի 14-ից 16-ը։
Ինչպես տեղեկացնում է Deutsche Welle-ն, այդ մասին հայտնել է Սպիտակ տունը՝ չմանրամասնելով, թե կոնկրետ ՌԴ որ ներկայացուցիչն է մասնակցելու հանդիպմանը։
ԱՄՆ էներգետիկայի նախարար Քրիս Ռայթը և Ներքին գործերի նախարար Դագ Բերգումը, ինչպես նաև նախագահ Դոնալդ Թրամփի վարչակազմի ներկայացուցիչ Ջարոդ Ագենը կմասնակցեն «էներգետիկ առատություն» խորագրով միջոցառմանը։ Ակնկալվում է նաև եվրոպական և ասիական էներգետիկ ոլորտների ներկայացուցիչների մասնակցությունը։
Չնայած հայտարարված օրակարգին՝ G20-ի հանդիպումն անցկացվելու է էներգետիկ անվտանգության շուրջ առկա լայնածավալ մտահոգությունների ֆոնին, որոնք պայմանավորված են Ուկրաինայում Ռուսաստանի մղած պատերազմով, ինչպես նաև ԱՄՆ-ի և Իրանի միջև առկա լարվածությամբ։
Իրավիճակն էլ ավելի է բարդանում Եմենում Թեհրանի աջակցությունը վայելող հութի ապստամբների հարձակումների պատճառով։ Վերջիններս սեպտեմբերի 10-ին գրավել են Եմենի արևմտյան ափին գտնվող Մոխա նավահանգստային քաղաքը և ամրապնդել իրենց դիրքերը Բաբ էլ Մանդեբի նեղուցի՝ Կարմիր ծով տանող հարավային դարպասի մերձակայքում։
