ԱՄՆ-ում Ջոնս Հոփքինսի համալսարանի հետազոտողին ձերբակալել են օդանավակայանում՝ ժամկետանց վիզայի պատճառով
ԱՄՆ Ներգաղթի և մաքսային ծառայության (ICE) աշխատակիցները Բալթիմոր/Վաշինգտոն օդանավակայանում ներքին չվերթի ինքնաթիռ նստելու պահին ձերբակալել են Ջոնս Հոփքինսի համալսարանի հետազոտող Ֆաթիմա Ամեակային, հայտնում է AFP-ն։
Միջադեպը տեղի է ունեցել նախագահ Դոնալդ Թրամփի վարչակազմի օրոք ամերիկյան օդանավակայաններում ներգաղթային ստուգումների խստացման ֆոնին։
ԱՄՆ ներքին անվտանգության նախարարության տվյալներով՝ Կամերունի քաղաքացին գերազանցել է վիզայով սահմանված ժամկետը։ Վիզայի ժամկետը լրացել էր 2024 թվականի հունիսին։ Այժմ նա գտնվում է ICE-ի կալանքի տակ՝ սպասելով արտաքսման գործընթացի մեկնարկին։
Ջոնս Հոփքինսի համալսարանի Բլումբերգի անվան դպրոցը, որտեղ աշխատում է հետազոտողը, Ամեակային անվանել է «համայնքի հարգված անդամ» և հայտնել նրան աջակցելու պատրաստակամության մասին։
Իրավաբանների խոսքով՝ վերջին շաբաթներին ամերիկյան իշխանություններն օդանավակայաններում էապես ակտիվացրել են օտարերկրացիների ձերբակալությունները։ Հատուկ ուշադրության կենտրոնում են հայտնվում վիզայի ժամկետըի պատճառով խնդիրներ ունեցող անձինք, նույնիսկ եթե նրանք արդեն դիմել են ապաստան ստանալու կամ ամուսնության միջոցով կացության իրավունք ձևակերպելու համար։
Ինչպես նշում են ամերիկյան ԶԼՄ-ները, վերահսկողության խստացումը կապված է ԱՄՆ Ներգաղթի և մաքսային ծառայության ու Տրանսպորտային անվտանգության վարչության (TSA) միջև համագործակցության ընդլայնման հետ։ Դա թույլ է տալիս նրանց միգրացիոն ռեժիմի խախտողներ հայտնաբերել նախաթռիչքային ստուգման ընթացքում։
