Աղվան Վարդանյանը կլինի «Հայաստան» խմբակցության ղեկավարը
Երեկ Ազգային ժողովի (ԱԺ) «Հայաստան» խմբակցության պատգամավոր Աղվան Վարդանյանի շուրջ աղմուկը հանգուցալուծվեց. Վերջինս հայտարարեց, որ վերցնելու է պատգամավորական մանդատը:
«Խաղաղվեք. հարցը փակված է:
Որ մանդատն ինձ համար տասներորդական է, ապացուցել եմ։
Բայց այս անգամ իմ` մանդատից հրաժարվել-չհրաժարվելու թեման շատ քննարկվեց։ Չէի արձագանքում։ Այս երկար պաուզան անուն ունի՝ ոջլոտության ստուգում։ Ուզում էի տեսնել՝ ով ով է, ով ինչի է արժանանալու։
Հիմա ասում եմ՝ մանդատը վերցնում եմ: Հրաժարվում եմ խոսքից, որ պարտքից չհրաժարվեմ։
Պարզվեց՝ ինչ-որ մարդիկ շատ-շատ են ուզում, որ խորհրդարանում չլինեմ։ Դրանց չեմ ուրախացնելու: Հետայսու ուրախացնելու եմ միայն նրանց, ովքեր ինձ գնահատում են։
Առանց համեստության՝ չեմ ուզում իմ բացակայությամբ խմբակցությունում խնդիրներ ստեղծվեն։
Խոսքը խոսք է, բայց ավելի կարևոր է պարտքի գիտակցումը։
Այս փուլում իմ պարտքն է` լինել թիմի հետ: Հատկապես՝ Իշխան Սաղաթելյանի և Նարեկ Կարապետյանի կողքին։
Վերջում՝ մանդատով, թե առանց, ես Աղվան Վարդանյանն եմ: Դուք ո՞վ եք»,-իր ֆեյսբուքյան էջում գրել էր Աղվան Վարդանյանը՝ փակելով այն քննարկումները, թե եթե ինքն ամիսներ առաջ ասել է, որ մանդատ չի վերցնի, եթե Նիկոլ Փաշինյանը վերարտադրվի, չի նշանակում, որ պետք է կառչել դրանից:
Ավելին, 168.am-ի տեղեկություններով՝ Աղվան Վարդանյանը պատրաստվում է դառնալ «Հայաստան» խմբակցության ղեկավար:
