Ուելսի արքայադուստրը 24 ժամում բարձրացել է Մեծ Բրիտանիայի 3 ամենաբարձր գագաթները՝ քաղցկեղի դեմ պայքարի համար միջոցներ հավաքելու նպատակով
Ուելսի արքայադուստր Քեյթը հանգստյան օրերին հաջողությամբ իրականացրել է «Three Peaks Challenge» արշավը՝ աջակցելու այն հիվանդանոցին, որտեղ երկու տարի առաջ քաղցկեղի դեմ բուժում էր ստացել․ գրում է CNN-ը։
Արշավի շրջանակում պահանջվում էր բարձրանալ Անգլիայի, Շոտլանդիայի և Ուելսի երեք ամենաբարձր լեռները 24 ժամվա ընթացքում։
Արքայադուստր Քեյթը նշել է, որ արշավն իրականացրել է՝ աջակցելու Չելսիում գտնվող The Royal Marsden Cancer Charity բարեգործական կենտրոնին, որը զբաղվում է քաղցկեղի բուժմամբ։
«Շատերն են ինձ հարցրել՝ ինչու եմ մասնակցում այս արշավին: Պատճառը մասամբ անձնական է․ ես անչափ երախտապարտ եմ այստեղ լինելու համար, և որ ունեմ բավական ուժ այս բլուրները բարձրանալու համար», – ասել է նա կիրակի հրապարակված տեսաուղերձում։
44-ամյա Քեյթը 2024 թվականի մարտին հայտարարել էր, որ իր մոտ ախտորոշվել է քաղցկեղ, և որ ինքը քիմիաթերապևտիկ բուժում է ստանում։ Մոտ մեկ տարի անց նա հայտնել էր իր վիճակի կայունացման մասին։
Այդ ժամանակից ի վեր Քեյթն աստիճանաբար վերադառնում է արքայադստեր իր պարտականություններին։ Նա ակտիվորեն ներգրավված է The Royal Marsden կենտրոնի աշխատանքներում՝ փորձելով աջակցել մարդկանց, որոնց մոտ քաղցկեղ է ախտորոշվել։ Անցյալ տարի Քենսինգթոնյան պալատը հայտարարել էր, որ արքայադուստրն ու նրա ամուսինը՝ արքայազն Ուիլյամը, դարձել են բարեգործական կազմակերպության համատեղ հովանավորը։
