ԱՄՆ-ի և Իրանի բանակցությունների ֆոնին օդային տարածքի փակումը խափանել է Ցյուրիխի օդանավակայանի աշխատանքը
Շվեյցարիայում ԱՄՆ-ի և Իրանի միջև խաղաղ բանակցությունների ֆոնին սահմանված անվտանգության միջոցառումների պատճառով օդային երթևեկության կառավարման համակարգի տեխնիկական խափանումը հանգեցրել է Ցյուրիխի օդանավակայանի աշխատանքի խանգարումների, հաղորդում է Reuters-ը՝ հղում անելով շվեյցարական ավիացիոն իշխանություններին։
Ինչպես պարզաբանել են Skyguide օդային երթևեկության կառավարման ծառայությունում, խնդիրը ծագել է այն բանից հետո, երբ ռադարների ցուցադրման համակարգում ավելացվել է թռիչքների համար արգելված գոտի Բյուրգենշտոկ լեռնային հանգստավայրի վրա, որտեղ ընթանում են բանակցությունները։ Այդ գոտին ստեղծելու որոշումը կայացվել է հրատապ կարգով, քանի որ բանակցությունների նոր փուլի անցկացումը համաձայնեցվել էր միայն շաբաթ օրը։
Ցյուրիխի օդանավակայանի տվյալներով, կեսօրին արդեն չեղարկվել էր ժամանող 12 և մեկնող 14 չվերթ։ Բացի այդ, ուշացումները ազդել են առնվազն 60 չվերթի վրա։
Skyguide-ում հայտնել են, որ խափանումներն արդեն վերացվել են, և օդային երթևեկության աշխատանքը լիովին կարգավորվել է։
«Համակարգերը գործում են անխափան, և թռիչքների անվտանգությունը միշտ ապահովված է եղել», — ընդգծել են գերատեսչությունում։
