Մահացել է «Տոպոլ» և «Իսկանդեր» արձակման համալիրների ստեղծող Վալերիան Սոբոլևը
87 տարեկան հասակում Վոլգոգրադում մահացել է «Տոպոլ» և «Իսկանդեր» արձակման համալիրների ստեղծող Վալերիան Սոբոլևը։ Այս մասին հայտնում է ՌԻԱ Նովոստին՝ հղում անելով նրա ընտանիքի բարեկամին՝ Վյաչեսլավ Չերեպախինին։
«Երեկ մահացել է։ Երկար ժամանակ հիվանդ էր։ Վալերիան Մարկովիչը լեգենդար դեմք է Վոլգոգրադի և պաշտպանական արդյունաբերության համար», – ասել է գործակալության զրուցակիցը։
Վալերիան Սոբոլևը ծնվել է 1938 թվականին Ստալինգրադում։ Ստալինգրադի մեխանիկական ինստիտուտն ավարտելուց հետո սկսել է աշխատել «Բարիկադներ» պաշտպանական ձեռնարկությունում, որտեղ եղել է ինժեներից մինչև գլխավոր կոնստրուկտոր, ապա ստեղծել է «Տիտան» կենտրոնական կոնստրուկտորական բյուրոն։ Բաց տվյալների համաձայն՝ նրա ղեկավարությամբ ստեղծվել են «Պիոներ», «Տոպոլ», «Իսկանդեր» և այլ արձակման կայանքներ։
Սոբոլևը տեխնիկական գիտությունների դոկտոր էր, պրոֆեսոր, Վոլգոգրադի պոլիտեխնիկական ինստիտուտի տեսական մեխանիկայի ամբիոնի վարիչն էր։
