Հունգարիան շարունակում է պատրաստվել ԱՄՆ-ՌԴ գագաթնաժողովին. Օրբան
Բուդապեշտում ռուս-ամերիկյան գագաթնաժողովի նախապատրաստական աշխատանքները շարունակվում են, և Հունգարիան պատրաստ է անել ամեն ինչ, որպեսզի ապահովի դրա հաջողությունը։
Այս մասին հայտարարել է Հունգարիայի վարչապետ Վիկտոր Օրբանը Kossuth ռադիոկայանի եթերում։
Օրբանին հարց են ուղղել, թե ինչպես է Հունգարիան աջակցում ռուս-ուկրաինական հակամարտության կարգավորման ջանքերին։
«Ես չեմ ուզում խոսել մանրամասների մասին։ Ի վերջո, Բուդապեշտում կարևոր խաղաղության գագաթնաժողովի նախապատրաստական աշխատանքներ են ընթանում», – ասել է նա։
Օրբանը նշել է, որ Հունգարիան «արժեքավոր ներդրում է կատարում խաղաղության գործում», քանի որ այն Եվրամիության միակ երկիրն է, որը բաց է պահել Ռուսաստանի հետ հաղորդակցության ուղիները և «մշտական կապի մեջ է» Մոսկվայի հետ։
«Մենք բանակցություններ ենք վարում նրանց հետ, և ես ամբողջ Եվրոպայում միակ վարչապետն եմ, որն անհրաժեշտության դեպքում կարող է խոսել Ռուսաստանի նախագահի հետ», – ասել է Օրբանը՝ հավելելով, որ դա շատ կարևոր է համարում խաղաղության հասնելու համար։ Հունգարիայի վարչապետը նշել է, որ հույսեր է կապում ԱՄՆ նախագահ Դոնալդ Թրամփի հետ՝ ռուս-ուկրաինական հակամարտության կարգավորման հարցում:
«Մենք խոսում ենք մի մարդու մասին, որը պատերազմը համարում է անիմաստ և ցանկանում է, որ այն ավարտվի: ԱՄՆ նախագահն ունի բոլոր հիմքերը՝ ձգտելու արդար իրավիճակ ստեղծել, և չնայած նա ցանկանում է ճնշում գործադրել ռուսների վրա, նա չի ցանկանում վնասել Հունգարիային», – ասել է վարչապետը՝ բացատրելով, թե ինչու է Թրամփը համաձայնել ազատել Հունգարիային ռուսական նավթի և գազի դեմ պատժամիջոցների ազդեցությունից:
Օրբանը նշել է, որ Հունգարիան դեռևս չի կարող գոյատևել առանց ռուսական էներգակիրների, բայց շարունակում է դիվերսիֆիկացնել իր մատակարարման ուղիներն ու աղբյուրները: Երկրում հրապարակված տվյալների համաձայն՝ 2024 թվականին «Թուրքական հոսք» գազատարով Հունգարիա է մտել 8,5 միլիարդ խորանարդ մետր գազ, իսկ «Դրուժբա» խողովակաշարով մատակարարվել է 5 միլիոն տոննա նավթ: Նման ծավալ է սպասվում նաև 2025 թվականին:
