Էրդողանը խոսել է Կատարի տարածքում Իսրայելի հասցրած հարվածների մասին
Թուրքիայի նախագահ Ռեջեփ Թայիփ Էրդողանը Sosyal սոցիալական ցանցում խոսել է Կատարի մայրաքաղաք Դոհայի վրա Իսրայելի հասցրած հարվածների մասին, հաղորդում է Anadolu-ն։
«Այսօր Կատարում ՀԱՄԱՍ-ի բանակցային թիմի վրա Իսրայելի կատարած հարձակումը ևս մեկ անգամ հստակ ցույց տվեց, որ Նեթանյահուի խելագար կառավարությունը ձգտում է խորացնել հակամարտությունը և անկայունությունը։ Այդ հարձակումը, որը միջազգային իրավունքի և Կատարի ինքնիշխանության ակնհայտ խախտում է, նաև թիրախավորում է մեր եղբայրական երկրի՝ Կատարի անվտանգությունն ու խաղաղությունը։ Ես դատապարտում եմ այդ հարձակումը։ Թուրքիան իր բոլոր ռեսուրսներով աջակցում է իր պաղեստինցի եղբայրներին և քույրերին, ինչպես նաև Կատար պետությանը՝ իր դաշնակցին, ռազմավարական գործընկերոջը և բարեկամին։ Նրանք, ովքեր ահաբեկչությունը վերածել են պետական քաղաքականության, երբեք չեն հասնի իրենց նպատակներին։ Մենք կպահպանենք մեր ամուր և անսասան դիրքորոշումը Իսրայելի ավազակության դեմ, որը ձգտում է ամբողջ տարածաշրջանը ներքաշել աղետի մեջ, և մենք կշարունակենք պաշտպանել խաղաղությունը, միջազգային իրավունքը և պաղեստինյան ժողովրդի ազատությունը ցանկացած գնով»,- ընդգծել է Էրդողանը։
