ՆԱՏՕ-ն անկայունության գոտի է ստեղծում Հարավային Կովկասում Ռուսաստանին դիմակայելու շրջանակում. Զախարովան զգուշացրեց Երևանին ու Բաքվին
ՆԱՏՕ-ն շարունակում է Հարավային Կովկասի երկրներն իր ազդեցության գոտի ներքաշելու քաղաքականությունը։ Այսօր ճեպազրույցի ժամանակ հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան։
Այսպես է նա մեկնաբանել ապրիլի 28-ին Վրաստանում՝ ՆԱՏՕ-ի հովանու ներքո մեկնարկած զորավարժությունները, որոնց որպես գործընկեր երկրներ մասնակցում են նաևՀայաստանն ու Ադրբեջանը:
Զախարովայի խոսքով՝ փոխգործակցության նման ձևաչափերի միջոցով ՆԱՏՕ-ն պարտադրում է իր չափանիշներն ու գաղափարախոսությունը, նպաստում է պաշտպանական ոլորտի կառուցվածքի փոփոխությանը և ձգտում է վերահսկողություն հաստատել այդ պետությունների զինված ուժերի զարգացման վրա:
«Որևէ մեկի մոտ պատրանքներ չպետք է լինեն. դաշինքի ցանկացած գործողություն Հարավային Կովկասում ուղղված է ոչ թե անվտանգության ամրապնդմանը, այլ անկայունության և ռազմաքաղաքական լարվածության գոտու ստեղծմանը»,- ընդգծել է նա:
Զախարովան հավելել է, որ դաշինքի հիմնական նպատակը տարածաշրջանի երկրների ներուժի օգտագործումն է հավաքական Արևմուտքի շահերի համար, և առաջնահերթ՝ Ռուսաստանի հետ աշխարհաքաղաքական դիմակայության համատեքստում: Մոսկվան ակնկալում է, որ տարածաշրջանի պետությունները ծանրութեթև կանեն նման նախաձեռնություններին մասնակցելու նպատակահարմարությունը։
Նշենք, որ «ՆԱՏՕ-Վրաստան 2025» հրամանատարաշտաբային զորավարժություններն ուղղված են բազմազգ ստորաբաժանումներին ճգնաժամային գործողությունների պլանավորման և անցկացման ուսուցմանը: Դրանց մասնակցում են դաշինքի անդամ և գործընկեր 17 երկրներ։ Զորավարժությունները մեկնարկել են ապրիլի 28-ին և կշարունակվեն մինչև մայիսի 8-ը:
