Պուտինը հանդիպում է ունեցել Թրամփի հատուկ պատվիրակ Ուիթքոֆի հետ
ՌԴ նախագահ Վլադիմիր Պուտինը մարտի 13-ի ուշ երեկոյան ընդունել է ԱՄՆ նախագահի հատուկ պատվիրակ Սթիվեն Ուիթքոֆին, որի միջոցով տեղեկատվություն է փոխանցել Միացյալ Նահանգների ղեկավար Դոնալդ Թրամփին։
Ինչպես տեղեկանում ենք ՏԱՍՍ գործակալությունից, այդ մասին հայտնել է Ռուսաստանի նախագահի մամուլի քարտուղար Դմիտրի Պեսկովը։
«Երեկ ուշ երեկոյան արդեն նրան (Ուիթքոֆին) ընդունել է նախագահ Պուտինը, ռուսական կողմին տրամադրվել է լրացուցիչ տեղեկատվություն: Ուիթքոֆի միջոցով Պուտինը տեղեկատվություն և լրացուցիչ ազդանշաններ է փոխանցել նախագահ Թրամփին», – ասել է Պեսկովը։
Պուտինի և Ուիթքոֆի զրույցի թեմաները Կրեմլի ներկայացուցիչը չի հայտնել։ Ավելի վաղ Սպիտակ տան մամուլի քարտուղար Քերոլայն Լևիթը հայտնել էր, որ ԱՄՆ ղեկավարի հատուկ պատվիրակը մեկնում է Մոսկվա՝ քննարկելու ռուս-ուկրաինական հակամարտության կարգավորման հարցը։
Ուիթքոֆը, որն ավելի վաղ մասնակցել է փետրվարի 18-ին Էր Ռիադում ռուսական պատվիրակության, իսկ մարտի 11-ին՝ ուկրաինական պատվիրակության հետ Ջիդդայում կայացած բանակցություններին, Մոսկվա էր ժամանել մարտի 13-ի ցերեկը։ Ըստ ՏԱՍՍ-ի աղբյուրի՝ նա ՌԴ մայրաքաղաքից մեկնել է մարտի 14-ին, Մոսկվայի ժամանակով ժամը մոտավորապես 11։00-ին:
