Ռուսաստանը և ԱՄԷ-ն հանդես են եկել Սիրիայի հարցով անհապաղ միջազգային հանդիպում կազմակերպելու օգտին
Ռուսաստանի արտաքին գործերի նախարար Սերգեյ Լավրովը և ԱՄԷ-ի արտաքին քաղաքական գերատեսչության ղեկավար Աբդուլլահ բեն Զայեդ Ալ-Նահյանը հեռախոսազրույցի ընթացքում կողմ են արտահայտվել անհապաղ միջազգային հանդիպման անցկացմանը` Սիրիայում բոլոր քաղաքական ուժերի մասնակցությամբ երկխոսություն սկսելու համար։
«ՌԻԱ Նովոստի»-ի փոխանցմամբ՝ այդ մասին հայտնել է ՌԴ ԱԳՆ-ն։
«Վերջին օրերին Ռուսաստանի և արաբական երկրների միջև տարբեր մակարդակներում տեղի ունեցած շփումների ընթացքում Ռուսաստանի և ԱՄԷ-ի արտաքին գործերի նախարարությունների ղեկավարները հանդես են եկել միջազգային հանդիպման հնարավորինս արագ անցկացման օգտին՝ Սիրիայի Արաբական Հանրապետության բոլոր քաղաքական և էթնո-դավանական ուժերի մասնակցությամբ, որպեսզի տրվի ազգային երկխոսության շուտափույթ մեկնարկը»,- նշվում է հաղորդագրության մեջ։
Նախարարները նշել են, որ նման երկխոսությունը պետք է սկսվի ՄԱԿ-ի Անվտանգության խորհրդի 2254 բանաձևում ամրագրված սկզբունքներին խստորեն համապատասխան։
Ռուսական կողմը նաև համապատասխան աշխատանք է տանում Սաուդյան Արաբիայի, Կատարի և արաբական այլ երկրների արտաքին գործերի նախարարությունների ղեկավարների հետ։
