ԱՄՆ-ում հաշվում են քվեաթերթիկները. Թրամփը հաղթել է տատանվող Հյուսիսային Կարոլինա նահանգում
ԱՄՆ-ում շարունակվում է նախագահական ընտրությունների քվեաթերթիկների հաշվարկը։ Երկու թեկնածուներն էլ հաղթել են համապատասխանաբար այն նահանգներում, որտեղ ավանդաբար հաղթում են հանրապետականները կամ դեմոկրատները։ Ընտրությունների ելքը սովորաբար որոշվում է տատանվող յոթ նահանգներում։
Reuters գործակալությունը հաղորդում է, որ տատանվող յոթ նահանգներից մեկում՝ Հյուսիսային Կարոլինայում, հանրապետական թեկնածու Դոնալդ Թրամփը հաղթել է դեմոկրատական թեկնածու Քամալա Հարիսին։
Մյուս վեց նահանգներում ընտրությունների ելքը դեռ անորոշ է։
Այնուամենայնիվ, Թրամփը բավական լավ արդյունքներ է գրանցել այլ նահանգներում ևս։ Նախնական տվյալներով, տեղի ժամանակով կեսգիշերի դրությամբ նա ապահովել է ընտրիչների 230 ձայն, մինչդեռ Հարիսը՝ 169 ձայն, անհրաժեշտ 270-ից։ Բացի նախագահական ընտրություններից, ԱՄՆ-ում նաև Կոնգրեսի ընտրություններ են անցկացվում։ Հանրապետականները մեծամասնություն են ստացել Սենատում՝ Արևմտյան Վիրջինիայում և Օհայոյում դեմոկրատներին պարտության մատնելուց հետո։ Մինչ այս շատ չնչին տարբերությամբ Սենատում գերիշխում էին դեմոկրատները։ Ներկայացուցիչների պալատի ընտրությունների ելքը դեռ պարզ չէ։ Այժմ այնտեղ փոքր տարբերությամբ գերիշխում են հանրապետականները:
ԱՄՆ նախագահի և փոխնախագահի ընտրություններն անուղղակի են։ Քվեարկելու իրավունք ունեցող ԱՄՆ քաղաքացիներն ընտրում են ոչ թե կոնկրետ թեկնածուներին, այլ Ընտրողների կոլեգիայի անդամներին՝ ընտրիչներին։ Ընտրիչներն այնուհետև իրենց ձայնը տալիս են տվյալ նահանգում առավելագույն ձայներ ստացած թեկնածուի օգտին։
Յուրաքանչյուր նահանգի կոլեգիայի անդամների թիվը համապատասխանում է Կոնգրեսում այդ նահանգի անդամների թվին։ Այն թեկնածուն, որը ստանում է ընտրիչների ձայների բացարձակ մեծամասնությունը՝ 538-ից առնվազն 270-ը, ընտրվում է նախագահ։
