Թրամփ․ Իրանի հետ պատերազմը շուտով կավարտվի, նավթի գները կտրուկ կնվազեն
ԱՄՆ նախագահ Դոնալդ Թրամփը հայտարարել է, որ Իրանի հետ պատերազմը «շուտով» կավարտվի, ինչից հետո նավթի համաշխարհային գները կտրուկ կնվազեն։ Այս հայտարարությունը ամերիկացի առաջնորդն արել է կիրակի՝ սեպտեմբերի 27-ին, Վաշինգտոնից մեկնելուց առաջ, հաղորդում է Fox News-ը։
«Նավթի գները կսկսեն նվազել, հենց որ Իրանը հանձնվի, հենց որ պատերազմը ավարտվի, և դա կլինի շուտով։ Նավթի գները կտրուկ կընկնեն», — ասել է Թրամփը լրագրողներին։
ԱՄՆ նախագահը չի հստակեցրել, թե, իր կարծիքով, կոնկրետ երբ կարող է ավարտվել հակամարտությունը։
Թրամփը նաև հայտարարել է, որ նախօրեին Հորմուզի նեղուցով անցել է նավթի ռեկորդային ծավալ, և, ըստ նրա, այն գերազանցել է նույնիսկ պատերազմի սկսվելուց առաջ եղած ցուցանիշները։ Ամերիկայի նախագահը նավթի քանակի վերաբերյալ կոնկրետ տվյալներ չի ներկայացրել։
Հայտարարությունը հնչել է ԱՄՆ-ի և Իրանի միջև հակամարտության դիվանագիտական կարգավորման հասնելու շարունակվող փորձերի ֆոնին։ Նախօրեին Թրամփը մերժել էր Թեհրանի առաջարկը, որը նախատեսում էր Հորմուզի նեղուցով լիարժեք նավարկության վերականգնումը՝ ԱՄՆ-ի կողմից մի շարք պայմանների կատարման դեպքում։ Միևնույն ժամանակ ամերիկացի նախագահը հայտարարել է, որ Իրանի հետ նոր բանակցությունները կարող են կայանալ արդեն այս շաբաթ։
