Լիբանանում նոր պայթյուններից վախի պատճառով սկսել են անջատել հեռախոսները
Լիբանանի բնակիչները պայթյունների երկրորդ ալիքից հետո անջատում են հեռախոսներն ու մյուս սարքերը՝ նոր պայթյուններից վախի պատճառով։ Այս մասին հաղորդել է The New York Times-ը։
Հրատարակության տվյալներով՝ լիբանանցիները նաև անջատել են ինվերտորներն ու արևային մարտկոցները։ Այժմ երկրի բնակիչները կասկածանքով են վերաբերվում նույնիսկ մանկական ռադիո մոնիտորներին, հեռուստացույցներին և նոութբուքերին։Ինչպես նշում է պարբերականը, փեյջերների պայթյունները լիբանանցիների առօրյան վերածել են «խուճապի և բռնության տեսարանների»։
Այս գրոհները լրջորեն խախտել են առողջապահական համակարգի աշխատանքը. հիվանդանոցները լեփ-լեցուն են տուժածներով:
Միևնույն ժամանակ հրատարակությունը պարզաբանում է, որ Իսրայելն ավելի ու ավելի շատ ռեսուրսներ է հատկացնում «Հեզբոլլահ» շիա շարժման դեմ պատերազմին՝ Գազայի հատվածի հակամարտությունից իր ուշադրությունը շեղելով այս ուղղության վրա։
Սեպտեմբերի 17-ին և 18-ին Լիբանանում հազարավոր փեյջերների և ռացիաների պայթյունների զոհերի թիվն, ընդհանուր առմամբ, հասել է 37-ի, շուրջ 3500 մարդ վիրավորվել է։ Իսրայելն ուղղակիորեն չի անդրադարձել Լիբանանում սարքերի պայթյուններին, սակայն ըստ տարբեր հրատարակությունների աղբյուրների՝ դրանց հետևում կանգնած է Իսրայելի «Մոսադ» հետախուզական ծառայությունը։
