«Հարսնաքարի» գործով ամբաստանյալը՝ մատուցողի մասին. Ինչ էլ եղած լիներ, նա իրավունք չուներ հաճախորդին խփելու
Երևանի Ավան և Նոր Նորք վարչական շրջաների ընդհանուր իրավասության դատարանում շարունակվում է «Հարսնաքարի» գործով դատական նիստը: Նիստը սկսվեց շուրջ 40 րոպե ուշացումով:
Նախագահող դատավոր Դավիթ Հարությունյանի խոսքով՝ ուշացման պատճառը դատավարության կողմերից մի քանիսի՝ տեխնիկական պատճառներով ուշացումն ու դատարանի՝ մեկ այլ քրեական գործով խորհրդակցական սենյակում գտնվելն էր:
Դատական նիստի ընթցքում գործով մեղադրյալ Նորայր Հայրապետյանի պաշտպան Երեմ Սարգսյանը միջնորդեց իր պաշտպանյալի հարցաքննության ընթացքում տեսանկարահանում չիրականացնել, որպեսզի իր պաշտպանյալը կարողանա օբյեկտիվ ցուցմունքներ տալ:
Դատարանը բավարարեց պաշտպանի միջնորդությունը: Դատարանում Նորայր Հայրապետյանը պատմեց, որ նախքան այս դեպքը տուժողներին չի ճանաչել: Դեպքի օրը նա շրջելիս է եղել ռեստորանային համալիրում և տեսել է, որ մատուցող Դավիթ Ադամյանը բացօթյա սրահի դիմաց ձեռքով հարվածել է հաճախորդներից մեկին, նրա կողքին է եղել նաև Արկադի Աղաջանյանը, որը փորձել է հրել մատուցողին:
Ամբաստանյալը պատմեց, որ տուժողներից ոմանք փորձում էին հաշվեհարդար տեսնել մատուցողի նկատմամբ: Նորայր Հայրապետյանի խոսքով՝ տուժողները շատ ագրեսիվ էին, գինովցած, ոչ մի կերպ չէին հանգստանում:
Ամբաստանյալի խոսքով՝ ինքը փորձել է հանդարտեցնել իրավիճակը, մատուցող Դավիթին հեռացրել է տարածքից, հայհոյել.
«Ամեն դեպքում՝ ինչ էլ եղած լիներ, նա իրավունք չուներ հաճախորդին խփելու»:
Տուժող Էդգար Նիկոյանը հարցրել է՝ որտե՞ղ կարող է Վահե Ավետյանը լվացվել, իսկ մեղադրյալ Արման Խաչատրյանը ցույց է տվել սանհանգույցի վայրը:
Տուժող Արտակ Բայադյանը հարցրել է՝ արդյոք Նորայր Հայրապետյանը կարո՞ղ է մատուցողի փոխարեն պատասխան տալ, իսկ ինքը պատասխանել է, որ նրա փոխարեն պատաախան չի կարող տալ, սակայն կարող են մեկ ուրիշ օր հանդիպել:
Ամբստանյալը պատճառաբանել է, որ ռեստորանային համալիրում այդ ժամանակ շատ մարդ է եղել և պետք չէ նրանց ներկայությամբ շարունակել: Արտակ Բայադյանն այդ ժամանակ առաջարկել է ուրիշ կողմ քայլել:
Նորայր Հայրապետյանի խոսով՝ տուժող Գարիկ Սողոմոնյանը թևանցուկ է արել իրեն, և իրենք խոսելով քայլել են. «Տպավորությունն այնպես էր, որ ոչինչ չի լինելու»:
Ավտոկայանատեղի հասնելուց հետո նրան մոտեցել է տուժող Արկադի Աղաջանյանը և ասել, որ զանգահարել է ինչ-որ մեկին և առաջարկել է խոսել հեռախոսով. ինքը հրաժարվել է դա անել: Մեղադրյալը տեսել է, որ մյուս կողմի վրա վիճաբանություն է սկսվել.
«Երկու քայլ եմ անում, տեսնեմ՝ Արտակ Բայադյանին բոլորը մայր էր հայհոյում: Երկու քայլ չէի քցել, Գարիկը ինձ մեր քրֆեց, ես էլ խփեցի Գարիկին»: Այդ ժամանակ մոտեցել է Էդգար Նիկոյանը, ասել, որ «տղաները խմած են, թողեք, հեսա սաղին հավաքում, գնում եմ»:
Ամբաստանյալը նշեց, որ ինքն ուղղակի զարացած է. տուժողներից ոմանք չեն ուզում ճիշտն ասել. «Ես փորձել եմ հադարտեցնեմ»: Նա նշեց, որ վեճը շատ կարճ է տվել՝ 30-40 վայրկյան: Տուժողները, ըստ նրա, «ֆիլմեր են նկարում», երբ ասում են, որ վեճը երկար է տևել: Նորայր Հայրապետյանը նաև ասաց, որ չի իմացել, որ ծանր վնասվածք ստացած մարդ է եղել:
Ամբաստանյալը հրաժարվեց պատասխանել դատավարության կողմերի հարցերին:
