Իրանում ընտրություններից առաջ կասեցրել են երկրի պատմության մեջ ամենախոշոր կիբեռհարձակումը
Իրանցի մասնագետները փետրվարի 28-ին՝ խորհրդարանի և Փորձագետների խորհրդի ընտրությունների նախօրեին, հետ են մղել երկրի պատմության մեջ ամենախոշոր DDoS հարձակումը` 136 միլիոն հարցում վայրկյանում։ Տեղեկությունը հայտնում է իրանական «Fars» լրատվական գործակալությունը:
Նշվում է, որ ընտրություններից մի քանի օր առաջ ընդհանուր առմամբ կասեցվել է մոտ 160 DDoS-հարձակում:
Իրանում մարտի 1-ին անցկացվել են Մեջլիսի և Իրանի փորձագետների խորհրդի ընտրություններ: Համապետական մասնակցությունն աննախադեպ ցածր է եղել` 41 տոկոս, մայրաքաղաքում` 24 տոկոս։ Պաշտոնյաները կանխատեսում էին, որ վերջնական ցուցանիշն ավելի բարձր կլինի, քան 2020 թվականի վերջին ընտրարշավի ժամանակ գրանցված 42,5%-ը, բայց դրանից էլ ցածր ցուցանիշ գրանցվեց։
Փորձագետների խորհուրդը հատուկ մարմին է, որի գործառույթների մեջ է մտնում Իրանի գերագույն և հոգևոր առաջնորդի ընտրությունը: Խորհրդի անդամ են դառնում 88 աստվածաբաններ, որոնք ընտրվում են 8 տարի ժամկետով։
