Կոլումբիայում սողանքների զոհ է դարձել 37 մարդ
Կոլումբիայի հյուսիս-արևմտյան Չոկո շրջանում սողանքների զոհերի թիվը հասել է առնվազն 37-ի: Այդ մասին CNN-ի իսպանալեզու ծառայությանը հայտնել են դատախազության գրասենյակից։
Սողանքներն ուրբաթ օրը՝ հունվարի 12-ին, տեղի են ունեցել Քիբդո և Մեդելին քաղաքների միջև ընկած ճանապարհին այն բանից հետո, երբ այդ շրջանում 24 ժամ հորդառատ անձրև է տեղացել:
Սողանքների հետևանքները վերացնելու և տուժածներին օգնելու համար մոբիլիզացվել են Կոլումբիայի տարերային աղետների ռիսկերի կառավարման ազգային ստորաբաժանումը, Կոլումբիայի քաղաքացիական պաշտպանությունը, Ազգային բանակը, Առողջապահության և սոցիալական պաշտպանության նախարարությունը և Չոկոյի ոստիկանական վարչությունը:
Կոլումբիան նախկինում ևս տուժել է մահացու սողանքներից։ 2017 թ. հարյուրավոր մարդիկ են զոհվել երկրի հեռավոր հարավային շրջանում այն բանից հետո, երբ հորդառատ անձրևների հետևանքով ցեխաջրերը հեղեղել էին Մոկոա քաղաքը:
