Նիկոլ Փաշինյանից «ձեռ են քաշում» անգամ ՔՊ-ականները. «Իրավունք»
«Իրավունք» թերթը գրում է. «Կայացավ «Քաղաքացիական պայմանագիր» կուսակցության համագումարը, եւ ընտրվեց վարչության նոր կազմը: Հատկանշական է այն, որ այս անգամ վարչության կազմում չկան ՆիկոլՓաշինյանի ընտանիքի հետ բարեկամական կապեր ունեցող ՔՊ-ականները:
Թեպետ իշխանական կուլիսներում շրջանառվում էին շշուկներ, որ ՔՊական պատգամավորներ Արսեն Թորոսյանն ու Արուսյակ Ջուլհակյանը ջանք ու եռանդ չեն խնայում նորընտիր վարչության կազմում լինելու համար, բայց նրանք էլ ցուցակից դուրս են մնացել: Չեն ընտրվել նաեւ այնպիսի կարկառուն ՔՊ-ականներ, ինչպիսիք են Սփյուռքի գործերի նախկին գլխավոր հանձնակատար Մխիթար Հայրապետյանը, ՔՊ-ական պատգամավորներ Վիլեն Գաբրիելյանը, Լենա Նազարյանը, Ռուստամ Բաքոյանը:
Ընդհանրապես անգամ թեկնածուների ցանկում ներառված չէր ԱԳ նախարար Արարատ Միրզոյանը:
Այսպիսով` ՔՊ-ի նորընտիր վարչության կազմում տեղ են գտել Նիկոլ Փաշինյանը, պաշտպանության նախարար Սուրեն Պապիկյանը, ԱԺ փոխնախագահ Ռուբեն Ռուբինյանը, Երեւանի փոխքաղաքապետ Տիգրան Ավինյանը, ՏԿԵ նախարար Գնել Սանոսյանը, ԵԿՄ նախագահ Սասուն Միքայելյանը, ԱԺ նախագահ Ալեն Սիմոնյանը, Փաշինյանի աշխատակազմի ղեկավար Արայիկ Հարությունյանը, ՀՀ փոխվարչապետ Համբարձում Մաթեւոսյանը, ՊՎԾ ղեկավար Ռոմանոս Պետրոսյանը, ԱԺ ՔՊ-ական պատգամավորներ Գեւորգ Պապոյանը, Արփի Դավոյանը, Վաղարշակ Հակոբյանը, Հայկ Կոնջորյանը:
Ըստ ՔՊ-ականներին մոտ կանգնած աղբյուրների` կուսակցության վարչության ընտրություններին 30 հոգի չի ընտրել Նիկոլ Փաշինյանին, ինչը բավական լուրջ ազդակ է եղել վերջինիս համար: Սա առնվազն փաստում է, որ Նիկոլ Փաշինյանից անգամ «ձեռ են քաշում» ՔՊ-ականները»:
